Maqsat Tolyqbaıdyń aıtýynsha, aýyldaǵy jurt osy azyn-aýlaq malynyń arqasynda kún kórip, jan baǵyp júr. Biraq, eldegi buqara baýkespe urylardan ábden záre-záp bolǵan.
«Aqyry Prezıdentten kómek suraýǵa májbúr bolǵan Shyǵys Qazaqstan oblysy, Qatonqaraǵaı aýdany turǵyndarynyń áleýmettik jelige shyqqan vıdeoúndeýlerin kórgen shyǵarsyzdar?! Maǵan da ondaǵan adam habarlasty. Ishki ister mınıstrligi málimdeme jasar dep bes kún kúttik. Alaıda eshqandaı reaksııa joq. Katonqaraǵaıǵa qarasty Shyńǵystaıdyń shyrqyn osy urylar buzyp bitirdi. Alaqandaı aýyl halqyna ury-qarynyń qorlyǵy ábden ótken. Tózimderi taýsylyp, senimderi setinegen el endi bar úmitterin El basshylyǵyna artyp, ıaǵnı Prezıdentten kómek surap otyr», dedi ol.
Depýtattyń pikirinshe, aýyldaǵy jurt qoıy qoralap, iri-qara tabyndap, jylqysy úıir-úıirimen joǵalyp jatqan soń polısııadan ábden kúder úzgen. Osy kúnge deıin halyqtyń qanshama maly qoldy bolyp, urlansa da, tártip saqshylary birde-bir «tyshqaq laqtyń» saıdan sanyn, qumnan izin tappaǵan. Bul polısııanyń ne izdeýge qulyqsyzdyǵyn nemese urymen aýyz jalasyp, ymyralasyp, yntymaqta jumys isteýi múmkin ekendigin bildiredi.
«Áýre sarsańǵa túsken halyq aýdandyq, oblystyq ishki ister organdarynyń tabaldyryǵyn tozdyryp, bastaryn taýǵa da, tasqa da soǵyp ábden qajyǵan. Sonda da polısııaǵa bári-bir. Jany ashymastyń, basy aýyrmas. Mal urlyǵynan shyrqy buzylyp, shydamdary taýsylǵan jalǵyz Shyńǵystaı emes. Baýkespeler Shyńǵystaıǵa irgeles jatqan О́rnek, Jańa úlgi, Aqqaınar, Jambyl, Eńbek sekildi eldi mekenderde de emen-erkin shaıqap, jurttyń dymyn qaldyrmaı, erik-jigerlerin ábden qum etken. Aýyldan aýdanǵa aryz arqalap baratyn aǵaıynnyń kúderi úzilip otyr. Ury men polısııa sybaılas bolmasa jyl on eki aıda bir joq tabylar edi ǵoı. Dandaısyǵan urylar tipti, aıylyn jııar emes», dedi Maqsat Tolyqbaı.
Onyń aıtýynsha, ishki ister organdary «Mal urlyǵy boıynsha zań qatań. Qylmystyq kodeks boıynsha bul ortasha aýyr qylmys. Asa iri mólsherde mal urlaǵandar 7 jyldan 12 jylǵa deıin sottalady», dep halyqty sendirgisi keledi. Al is júzinde bári kerisinshe.
«Qurmetti Ishki ister mınıstri jáne onyń eldegi barlyq jeke quramy! Sizderdiń nazarlaryńyzǵa!
Qazaq «Mal ashýy – jan ashýy» deıdi. Jurttyń jan ashýyn qozdyryp, jarasyna tuz sebe bermeńizder! Ashynǵan halyq barymtaǵa qarymta qaıtaramyz dese, ony myna biz túgili Siz jáne Siz basqaryp otyrǵan mınıstrliktiń jeke quramy toqtata almaıtynyńyzdy taǵy da esińizge salǵym keledi. Halyqpen oınamańyzdar! Oılanyńyzdar! Qaıta joǵaryda aty atalǵan aýyldardyń máselesin jiti qadaǵalap, Shyǵys Qazaqstan oblysy Qatonqaraǵaı aýdanynda arnaıy reıd júrgizip, mal urlyǵynyń aldyn-alý men urylardy ustaý boıynsha keshendi sharalardy qolǵa alýdy suraımyn», dep saýalyn qorytyndylady Maqsat Tolyqbaı.
