1998 jyly Máskeýde Dúnıejúzilik jasóspirimder oıyndarynyń tusaýy kesildi. Alǵash ret uıymdastyrylyp otyrǵan jarysta elimizdiń sportshylary kúmis pen qolany ǵana enshileýmen shekteldi. Balýandar da, boksshylar da, basqa da sport túrleriniń ókilderiniń birde-bireýine bas júlde buıyrmady. Sol olqylyqtyń ornyn Erlan Slıambaev toltyrdy. 55 kılo salmaq dárejesinde beldesken ol bastapqy básekelerde Belarýs, Nıderland, Túrikmenstan balýandarynyń aıaǵyn kókten keltirse, jartylaı fınalda Ázerbaıjan ókilin jeńdi. Fınaldyq aıqasta belgııalyq Iýng Gaskardyń osal tusyn ońaı taýyp, jarys jeńimpazy atandy. Osy jarqyn jeńisinen keıin E.Slıambaevtyń ataǵy tipten sharyqtady.
Kúres álippesin týǵan jeri – Abaı oblysy, Úrjar aýdanynyń burynǵy Jarbulaq, qazirgi Qabanbaı aýylynda úırengen Erlan 8-synyptan keıin Almatydaǵy Qajymuqan atyndaǵy mektep-ınternatta sheberligin shyńdady. Alakóldiń jaǵalaýynda jergilikti jattyqtyrýshy Serikhan Sháripovten tálim-tárbıe alǵan bozbala Alataý baýraıynda kóptegen daryndy dzıýdoshylardyń tomaǵasyn sypyryp, úlken arenaǵa jol ashqan elimizdiń eń bilikti bapkerleriniń biri Manarbek Taýtanovtyń qol astynda jattyqty.
Almatyǵa kelgende de Erlan «kóptiń biri emes» ekendigin áý bastan-aq ańǵartady. Jattyǵý zalynda shelektep ter tógip, ár jarysta janyn salyp aıqasty. Boıy tapal, denesi shyǵyrshyqtaı bozbala dzıýdo kúresindegi kúrdeli ádisterdi kóz ilespes jyldamdyqpen oryndap, kópshilik nazaryn birden ózine aýdarady.
Kóp uzamaı E.Slıambaevtyń jeńisti joly bastaldy. 1996 jyly jasóspirimder birinshiligi men О́zbekstannyń Shyrshyq qalasynda ótken halyqaralyq týrnırde úshinshi satyǵa jaıǵasty. Kelesi jyly Germanııa men Túrkııaǵa sapar shegip, Bremende bas júldeni oljalasa, Ankarada qola medaldy moınyna ildi. 1997–1998 jyldary qatarynan eki ret el chempıonatynda aldyna jan salmady.
Ǵasyrlar toǵysynda Erlan 66 kılo salmaq dárejesine aýysty. Jańa salmaqqa beıimdelý ońaı bolmaǵanymen, elishilik jarystarda únemi jeńimpazdar, júldegerler sanatynda júrdi. 2002 jyly Pýsanda alaýy tutanǵan Azııa oıyndaryna qatysyp, besinshi orynǵa taban tiredi. 2003 jyly Chedjýde (Ońtústik Koreıa) uıymdastyrylǵan qurlyq chempıonatyn qola medalmen qorytyndylady. Sodan Afına Olımpıadasynda atoı salýdy armandady.
2004 jyly Almatyda Azııa chempıonaty ótti. Osy jarysta Olımpııa oıyndarynyń joldamalary sarapqa salyndy. Ulttyq qurama bapkerleri «Qurlyqtyń basty dodasynda 66 kılo salmaq dárejesinde kim kúresýge laıyq?» degen saýalǵa biraz bas qatyrdy. Sodan úsh úmitkerdi iriktep alyp, ózara beldestirýdi jón kórdi. Bul tartysta Erlan daryndy jas Arsen Hatıpti utqanymen, tájirıbeli Muratbek Qypshaqbaevqa ese jiberdi. Osy sátsizdiktiń saldarynan Azııa chempıonatyna qatysyp, Olımpıada joldamasyna talasý múmkindiginen aıyryldy. Bul jaǵdaı oǵan aýyr tıdi. Álbette, ár sportshynyń basty armany – Olımpııa oıyndarynda óner kórsetip, jeńis tuǵyryna kóterilý. Alaıda jastaıynan dara talantymen oqshaýlanǵan namysqoı jigit dittegen maqsatyna jete almady. Sodan soń úlken sporttan qol úzdi. Ol kezde Erlan nebary 23 jasta edi...
– Arada talaı jyl ótse de, ókinishtiń orny tolmaıdy eken. Ǵalamdyq dodaǵa qatysa almaǵanym esime tússe, kúni búginge deıin kóńilim nildeı buzylady. О́tkenge zer salsam, eshkimnen az eńbektenbegenim anyq. Jattyǵý zalynda aıanǵan emespin. Jaýapty jarystarda ózime júktelgen mindetti árkez abyroımen atqarýǵa tyrystym. Qandaı da bıik belesterdi baǵyndyrýǵa boıymdaǵy kúsh-qýatym men qarym-qabiletimniń jetetinine kúmándanǵan kezim joq. Biraq atam qazaq «Taýdaı talap bergenshe, barmaqtaı baq bersin» degen ataly sózdi beker aıtpaǵan eken. Bálkim, maǵan sol barmaqtaı baq jetispegen bolar... Búginde baıqasam, jeńip alǵan júldelerimdi tizbelese bir betten erkin asady eken. Soǵan qarap, kóńilim kádimgideı kóteriledi. «Olımpıadaǵa barmasaq ta, biz de bir kisideı kúresippiz ǵoı» dep óz-ózimdi jubatyp otyramyn, – dep Erlan ezý tartty.
Sporttyq mansabyn aıaqtaǵannan keıin Erlan túrli kásiptiń tutqasyn ustady. Kommersııalyq uıymdarda jumys istedi, bıznespen aınalysty, «Qazposhtanyń» fılıalyn basqardy, Almatydaǵy «Arlan» bazarynyń dırektory, Halyqqa qyzmet kórsetý ortalyǵy basshysynyń orynbasary boldy. Qaı jerde júrse de súıikti sportynan alystaǵan joq. Ara-tura jarystar ótip jatqan jerlerge at basyn buryp, básekelerdi qyzyǵa tamashalaýdy, jalyndap ósip kele jatqan jastarǵa qamqorlyq kórsetýdi daǵdyǵa aınaldyrǵan. Osy jaǵdaıdyń barlyǵy dzıýdo federasııa basshylyǵy tarapynan eskerýsiz qalǵan joq. Olar isker ári jomart jigittiń eńbegin durys baǵalady. Jýyrda Erlan Qapsemetuly Almaty qalalyq dzıýdo federasııasynyń vıse-prezıdenti qyzmetine taǵaıyndaldy.
Shyny kerek, kúrestiń bul túri Alataý baýraıyndaǵy ásem shaharda turalap tur. Ulttyq qurama sapynda Almatynyń eki balýany ǵana bar. Olar – Ǵalııa Tyńbaeva, Sherzat Davlatov. Árıne, 2,2 mıllıonan asa halqy bar megapolıske bul tym az. Mine, sol olqylyqtyń ornyn toltyrý Erlan Slıambaev sekildi kúrestiń «otymen kirip, kúlimen shyqqan» isker azamattarǵa júktelip otyr.
Aıta ketken jón, Alakóldiń dál jaǵalaýynda ornalasqan Qabanbaı aýylynan Erlan Slıambaevtan bólek, taǵy birneshe tanymal balýan shyqty. Sol sańlaqtar arasynan Saǵdat Sadyqov pen Erkebulan Qosaevtyń shoqtyǵy bıik. Olardyń ekeýi de Olımpııa oıyndarynda kúsh synasty. Saǵdat 2000 jyly Sıdneı, 2004 jyly Afınada aıqassa, Erkebulan 2012 jyly Londonda el namysyn qorǵady. О́kinishke qaraı, baby keliskenimen, baǵy kem bolǵan Erlanǵa ondaı baqyt buıyrmady.
