Sýret: sportplustv.kz
Damır 1991 jylǵy 3 aqpanda Reseıdiń Orynbor oblysy, Pervomaı aýdanynyń Ýdarnyı aýylynda dúnıege kelgen. Sporttyq jolyn fýtboldan bastap, 20 jastan asqanda ǵana aralas jekpe-jekke den qoıdy. «Almas kezdik qap túbinde jatpaıdy» demekshi, kóp uzamaı ataǵy alysqa jaıyldy. Áý basta irili-usaqty týrnırlerde top jardy. 2017 jyly Reseıdegi «M-1» uıymynyń chempıony atandy. Fınaldyq básekede Neva jaǵalaýynan kelgen Maksım Dıvnıchti utty. Odan keıin óz ataǵyn úsh márte sátti qorǵady. Brazılııalyq Rojerıý Matıas da Konseısan, Raýl Týtaraýlı, Artem Damkovskıdi jeńdi. 2014–2018 jyldar aralyǵynda 20 ret oktagonǵa shyǵyp, sonyń tek bireýinde ǵana utyldy. Qalǵan básekelerde onyń basymdyǵy esh kúmán týǵyzǵan joq.
2018 jyly D.Ismaǵulov UFC-men kelisimshartqa otyrdy. Álemdegi eń beldi promoýshende tórt jyldaı óner kórsetip, jeti jekpe-jek ótkizdi. Bes ret utyp, eki ret utyldy. Aleks Gordjıs, Hoel Alvares, Tıagý Moızes, Rafael Alvıs, Gýram Kýtateladzeni qapy qaldyrǵanymen, Arman Sarýkıan men Grand Doýsondy jeńe almady. Sodan soń alystaǵy Amerıkadan elge oraldy. Byltyr qazaq faıteri eki ret aıqas alańyna shyqty. Almatyda Dmıtrıı Klımovty utsa, Aqtóbede Oberdan Vıeıra Tenorıony teýip qulatty.
Danııar Qasqaraýov jetekshilik etetin «Alash Praıd» promoýsheni 2016 jyldyń 15 jeltoqsanynda Alataý baýraıynda dúbirli doda uıymdastyrdy. Sol kezde Reseıde týyp-ósken qandasymyzdyń ónerin alǵash ret tamashaladyq. El Táýelsizdiginiń 25 jyldyǵyna arnalǵan jarysta Temirlan Aısádilov, Aıbek Nurseıit, Murat Baqtyorazov syndy jergilikti jampozdardy san soqtyrdy. Sóıtip bas júldege tigilgen «temir tulpardy» tizgindedi.
