Qos kitaptyń tusaýkeserin belgili jýrnalıst Qurmanáli Qalmahanuly júrgizdi. Ol avtordyń uzaq jylǵy qaýipti de jaýapty salada atqarǵan qyzmeti týraly keńinen áńgimelep, arasynda derekti fılmderdi kórsetip otyrdy. General-leıtenant Abaı Tasbolatov, qoǵam qaıratkerleri Álıhan Báımenov, Ersultan Bekturǵanov, generaldar Áset Ádilhan, Dáýlet Salhanov, Muhtar Aıýbaev, elge esimi keńinen tanys Elsııar Qanaǵatov, Tastanbek Esentaev, Nesip Júnisbaev sóz alyp, bul jınaqtyń jastar úshin erekshe ekenin, patrıottyq tárbıe berýde mańyzdy ekenin atap ótti.
Úsh bólimnen turatyn bul qos kitapta 1990 jyldardaǵy qylmysqa qarsy kúres, kepilge alǵandardy bosatý, qarýly qylmystyq toptardy joıý, ekstremızm men terrorızm aktilerin oqshaýlaý sııaqty arnaıy jasaqtyń eren eńbekteri men erlikteri detektıv jelisinde baıandalady. Birinshi bólimdegi «Syǵan qyzyn bosatý», «Bir ózenniń qos jaǵasy nemese Ryjıı Almazdy ustaý», «Kepilge alynǵan kásipkerdi bosatý», «Jurtty úreılendirilgen «Chetyre bratıa», «Asqar Jambýlskıı oqıǵasy» atty taqyryptarda avtordyń kózben kórip, qylmysty óz bóliminiń sarbazdary quryqtaǵan oqıǵalary asa tartymdy sýrettelgen. Al kitaptyń ekinshi bólimindegi «Kók saýytty arlandar», «Otan úshin otqa tús, kúımeısiń», «Ekstremızmge qarsy kúres», «Urlanǵan bala týraly oqıǵa», «Shubar» elıtalyq aýdanynda bolǵan oqıǵa» atty jazbalary oqyrmannyń birden nazaryn aýdaryp, bir demde oqyp shyǵasyz.
Al kitaptyń úshinshi bóliminde avtordyń sporttyń bir túri qoıan-qoltyq urysynyń elimizde qalaı damyǵany, «Dınamo» sport qoǵamy saıypqyrandarynyń el abyroıyn asqaqtatýdaǵy jeńisti joldary týraly aıtylady. «Sport – máńgilik serigim» atty maqalasynda «adamdy jetistikke jetkizetin tabandylyq pen tózimdilik» deıdi de, ózimen birge qyzmettes bolǵan áriptesteri jóninde baıandaıdy.
Ońdasyn ELÝBAI,
jýrnalıst
