Á.Qasteev mýzeıi – elimizdegi tarıhy taǵylymdy, mazmuny baı óner ordasynyń biri. Mýzeıde 26 myńnan astam óner týyndysy bar. Onda qazaq halqynyń óneri men rýhanı murasy qamtylǵan. Teńdessiz týyndylar qatarynda keskindeme, grafıka, músin, sándik-qoldanbaly óner jaýharlary usynylǵan. Olardyń ishinde Qazaqstan óneriniń altyn qoryna engen túpnusqa eksponattar da bar.
Endi, mine, mýzeıdiń 90 jyldyǵy qarsańynda aıtýly óner ordasynyń aýqymdy shyǵarmashylyq josparlary júıelendi. Sondaı aıtýly oqıǵalardyń biri – «Qazaqstannyń zamanaýı óneri» atty jańa zaldyń ashylýy. Bul ekspozısııa elimizdiń jetekshi sýretshileriniń shyǵarmalaryn qamtıdy. Qazaqstannyń sándik-qoldanbaly óneri – ejelgi dáýirden kele jatqan jáne bizdiń zamanymyzǵa deıin saqtalǵan rýhanııat pen dástúrdiń ulttyq bastaýy sanalatyn mańyzdy bólimdi usynady.
Sondaı-aq bıyl mýzeı tarıhy men órkendeýine arnalǵan retrospektıvti fotokórme ótkizý josparlanýda. Mýzeıdiń búginge deıingi tarıhy men órkendeý joly jan-jaqty qamtylatyn kórmede biregeı muraǵattyq qujattar kóshirmesi, fotosýretter usynylady.1935 jyldan bastalǵan ǵylymı, qor saqtaý, kórme uıymdastyrý jáne ekskýrsııalyq qyzmetterge erekshe nazar aýdarylyp, osy kúnge deıin ótkizilip kele jatqan kóptegen kórme jobasy men aýqymdy is-sharanyń fotosýretteri kórsetiledi.
Budan bólek, ujym Mádenıet jáne aqparat mınıstrliginiń qoldaýymen «Qazaqstannyń zamanaýı sándik-qoldanbaly óneri» atty eki tomdyq katalog shyǵarýdy josparlap otyr. Katalogte metaldan, tastan, aǵashtan, bylǵarydan jasalǵan buıymdar, zergerlik buıymdar, keramıka, farfor, shyny, gobelender, kıizden, júnnen jáne shıden jasalǵan sándik panelder bar. Týyndylar 1938–2020 jyldar aralyǵyn qamtıdy.
Al «Jandanǵan jaýharlar» kórmesinde 100-ge jýyq restavrasııalanǵan týyndy usynylady. Keskindeme, grafıka, músin jáne qolóner, toqý, zergerlik, kıizden jasalǵan buıymdar jáne t.b. restavrasııa jumystary sıpattalǵan tólqujattarymen, «deıin» jáne «keıin» fotosýretterimen birge júredi. Kórmege kóptegen jumysqa ekspozısııalyq kórinis berip, kóp kúsh jumsaǵan, eleýli eńbek sińirgen aǵa býyn restavratorlary shaqyrylady dep josparlanýda.
Sonymen qatar mereıtoılyq jylda Qazaqstan men álem arasyndaǵy mádenı dıalogti nyǵaıtýǵa baǵyttalǵan birqatar iri halyqaralyq joba júzege asyrylady. Atap aıtsaq, jyldyń mańyzdy jobalarynyń biri – Máskeýdegi ataqty Tretıakov galereıasynda ótetin mýzeı qoryndaǵy Ábilhan Qasteev jumystarynyń kóshpeli kórmesi. Onda sheberdiń 50 grafıka jáne akvarel jumystary usynylady. Retrospektıvalyq kórmede reseılik kórermen sýretshiniń shyǵarmashylyq damýynyń barlyq kezeńderin tamashalaı alady. Al Oral Tańsyqbaevtyń 120 jyldyǵyna arnalǵan О́zbekstan mádenıet jáne ónerdi damytý qory uıymdastyrǵan halyqaralyq joba Qazaqstan men О́zbekstannyń jetekshi mýzeıleriniń kolleksııalaryn biriktiredi. Sondaı-aq Qytaı Ulttyq mýzeıiniń halyqaralyq kórmesinde qytaılyq erekshe keskindeme, músin, gravıýra, kompozısııalyq materıal, akvarel, gýash jáne lak keskindemesi sekildi 50-den astam týyndy usynylady. Mýzeı aýqymyndaǵy taǵy bir mańyzdy ǵylymı oqıǵa – jyl saıynǵy «Qasteev oqýlary» ǵylymı-praktıkalyq konferensııasy. Dástúrli is-sharada mýzeı isin zertteýshiler men ónertanýshylar bas qosyp, mýzeı jumysynyń mańyzdy máseleleri talqylanady dep kútilip otyr.
