Foto: Erlan Omar
Eń aldymen Prezıdent keńesshisi Baýyrjan Omarov eki gazettiń 105 jyldyq mereıtoıyna arnalǵan Qasym-Jomart Toqaevtyń quttyqtaý hatyn jetkizdi.
«Alǵashqy sany jaryq kórgennen bastap qos basylym elimizdi órkendetý jáne berekeli birligimizdi nyǵaıtý isine ólsheýsiz úles qosyp keledi. Qazaqtyń birtýar perzentteri negizin qalaǵan gazetterde oıy ushqyr sóz zergerleri qyzmet etti. Olar halyqtyń sózin sóılep, ult máselesin bárinen bıik qoıdy. Ǵasyrdan astam ýaqyt ishinde bul aqparat quraldary qazaq jýrnalıstıkasynyń qara shańyraǵyna aınaldy. Jasampaz isterdiń jarshysy oqyrman qaýymnyń rýhanı shamshyraǵy retinde tanyldy. Búginde bul basylymdardyń qyzmetkerleri aǵa býyn salǵan sara joldy laıyqty jalǵastyryp keledi. Sizder ulttyń jańa sapasyn qalyptastyrý jolynda qajyrly eńbek etip júrsizder. Aldaǵy ýaqytta da shynaıy aqparat pen sapaly saraptamany basshylyqqa alyp, óz mindetterińizdi abyroımen atqara beresizder dep senemin. Barshańyzǵa rızashylyǵymdy bildiremin jáne baq-bereke, tolaıym tabys tileımin!», delingen Prezıdent quttyqtaýynda.
Dóńgelek ústel barysynda ulttyq baspasózdiń, onyń ishinde «Egemen Qazaqstan» men «Kazahstanskaıa pravda» basylymdarynyń qoǵamdaǵy orny, aqparat aıdynyndaǵy áleýeti jáne olardyń ulttyq múddeni qorǵaýdaǵy mańyzy talqyǵa salyndy.
Belgili jýrnalıst Saýytbek Abdrahmanov saladaǵy jańa bastamalar men reformalar týraly oıyn ortaǵa saldy. Gazet oqyrmandarynyń sanyn arttyrý úshin jan-jaqty jumys júrgizý qajettiligin jetkizdi.
«Ekonomıkalyq turǵydan tıimsiz bolǵanymen, ulttyq basylymdarǵa memleket tarapynan qoldaý kórsetilýi kerek. Sebebi gazet – ult rýhanııatynyń altyn ustyny», dedi S. Abdrahmanov.
Ardager jýrnalıst Janat Elshibek qazaq baspasóziniń damý úderisi týraly sóz sóılep, búgingi kúnniń jýrnalısine qajet qabiletter týraly pikirin bildirdi. Gazet shyǵarý barysynda aldyńǵy tolqyn aǵalar men keıingi tolqyn inilerdiń sabaqtastyǵy men rýhanı baılanysynyń mańyzdylyǵyn atap ótti.
Sonymen qatar jýrnalıster Qasym-Jomart Toqaevtyń suhbatynda aıtylǵan «Azamattardyń jasampazdyq áleýetin arttyrý úshin paıdaly ınvestısııa» jasaý máselesin talqyǵa saldy. Memlekettiń tutastyǵy men rýhanı birligin qalyptastyrýdaǵy BAQ ókilderiniń mańyzy jóninde oı qozǵady.
Jıyn sońynda táýelsizdiktiń rámizindeı bolǵan qos basylym «Egemen Qazaqstan» men «Kazahstanskaıa pravda» gazetteriniń ardagerleri qyzmettegi áriptesterine estelikterin aıtyp, aq jol tiledi.
