Baspasóz qyzmetiniń málimetterine qaraǵanda, 2024 jyly Sybaılas jemqorlyqqa qarsy is-qımyl agenttigi Dárilik zattar men medısına buıymdaryn saraptaý ulttyq ortalyǵynyń (DZSUO) qyzmetindegi sybaılas jemqorlyq táýekelderine syrtqy taldaý júrgizdi.
Buǵan deıin «SK-Farmasııa» uıymynda júrgizilgen taldaý satyp alý qunynyń negizsiz artýymen baılanysty eleýli táýekelderdi anyqtaǵan bolatyn.
Belgili bolǵandaı, bul máseleler tikeleı DZSUO qyzmetimen baılanysty.
Negizgi táýekelder – shyǵyndar men jetkizýshilerdiń ústemeaqysy týraly aqparattyń jabyqtyǵy, aqparattyq júıelerdiń bólshektenýi jáne derekterdi qaıta tekserý mehanızminiń bolmaýy.
Densaýlyq saqtaý mınıstrliginiń buıryqtary jetkizýshilerdiń kólik shyǵyndaryna, marketıngke jáne sapany baǵalaýǵa negizsiz ústemeaqy engizý arqyly dári-dármek baǵasyn qalyptastyrýǵa múmkindik bergen.
Nátıjesinde dári-dármekterdiń tirkeýden ótkennen keıin dárihanalar sórelerine túsýine deıingi baǵasy eki eseden astam ósken.
Osydan úlken farmasevtıkalyq kompanııalar artyq paıda tapqan.
Agenttik Densaýlyq saqtaý mınıstrligine negizsiz ústemeaqylardy joıý jáne monıtorıng júrgizýge arnalǵan biryńǵaı aqparattyq júıeni engizý boıynsha usynystar engizdi.
Prezıdent Ákimshiligi Basshysynyń buıryǵymen osy salada baǵa belgileý júıesin sıfrlandyrý boıynsha Jumys toby quryldy.
Qazirgi ýaqytta Sybaılas jemqorlyqqa qarsy qyzmettiń usynystaryna sáıkes dári-dármekterdiń shekti baǵasy men satyp alý tártibine qatysty densaýlyq saqtaý mınıstriniń úsh buıryǵyna ózgerister engizildi.
Nátıjesinde negizsiz ústemeaqylar alynyp tastaldy, bul keıbir dári-dármekterdiń baǵasynyń tómendeýine oń áser etedi.
