Sýret: multiurok.ru
– Áleke, tilshi bop ornalastym. Bir jetige mursat aldym, aýyl-aımaqty aralap qaıtsam dep erteń kólikke aıaq artpaqpyn, — dep telefon soqtym.
– Qap-aı-á, baldyz kele jatqanda, myna qurǵan kóliktiń kiltıpany ustap, qyltıyp qalǵany. Áıtpese ózińdi týra anaý burylystan bókterip alatyn jónim bar, — degen boldy.
* * *
Úıine deıin tepeńdep óz aıaǵymmen bardym. Bolyp ketkenshe: «Oıpyr-aı-á, tilshimin de… jazamyn de…» dep tańdana teperishtenip sóılegen saıyn: «Oıpyr-aı-á, qaǵaz kemiremin de… shımaı-shatpaq jazamyn de…» dep keketip, apaıym qaqpaqyl jasap kılikpegende, biraz jerge baratyn edi.
...Sodan, qyzmet aýystyryp, demalysymdy alyp, aýyl qaıdasyń dep tartar aldynda jezdeme habarlasyp:
– Áleke, qyzmet aýystyrdym. Tilshilikti qoıyp, ınstıtýttyń aspırantýrasy buıyrdy, – dep edim:
– Oý, mine azamat! Aspırant! Keremet! Sóz qysqa, qaı avtobýspen shyǵasyń? – dep báıek bop jatyr. — Burylystan bókterip alamyn. Árirekten kútip alatyn jónim bar, myna páleket tútindep-túshkirip, shabysy aýyl-aımaqtan uzaı almaı júrgeni.
* * *
...Baryp qaıtqanbyz. Jezdem aıtqanynan qalt ketpedi, burylystan óz kóligine aýdaryp mingizip aldy. Bolyp ketkenshe, meniń «qaǵaz kemirýdi» qoıyp, aspırant bolǵanymdy táýba qylyp qaradomalaq jıenderimniń basynan sıpap otyryp biraz noqtaly áńgime aıtty.
* * *
Aspırantýrany aıaqtap, buıryq solaı buıyryp, burynǵy gazetime bólim bastyǵy bop turyp, aýylǵa attanar aldynda jáı-kúıimdi aıtyp jezdem Álekeńmen sóılesip edim, sońǵy sózi mynaý boldy:
– Qap-aı! О́zińniń jóniń bólek, kútip-aq alý kerek edi, kóligimniń biraz ishek-qarnyn ashyp qoıyp edim, – dedi.
... Úıine deıin óz aıaǵymmen bardym. Nege ekenin, jezdem eki sóziniń birin — meniń aspırantýradan keıin ınstıtýtta qalmaı «qalbalaqtap» taǵy da qaǵaz kemirýge tap bolǵanyma qapalanýmen boldym.
Berik SADYR
