Maıdanger ata sulyq jatyr. О́ńsiz, tilsiz qalpynda. Qanqasap maıdanda soǵysyp, odan keıingi kúırep qalǵan halyq sharýashylyǵyn qalpyna keltirý tusynda jan aıamaı eńbek etý ońaı sharýa emes qoı. Qyzy Elena Kazımırovna «mazasyn almańyzdar» dep shyr-shyr etedi. Amal joq, kóne qujattardy, ilkidegi jazbalardy aqtaryp, ómir deregin izdestirdik.
Soǵys bastalǵanda Soltústik Qazaqstan oblysyna qarasty Taıynsha aýylynda áke-sheshesimen birge turypty. Zulmat soǵystyń zardabyn maıdan shebine barmaı-aq sezingen. Qabyrǵasy qatyp, býyny bekip úlgermegen órimdeı jas aldymen tyldaǵy maıdannyń aýyrtpalyǵyn arqalaǵan. «Bári de maıdan úshin!» degen uranmen qarýlanǵan barsha el kún-tún demeı ujymshar jumysyna jegilgen. Bozbala Kazımır Beımart ta kóppen birge zilmaýyr júkti arqalaǵan. On segiz jasqa tolǵan soń maıdanǵa attandyrylǵan. Birden ajal ańsaǵan oq jańbyrsha jýyp turǵan aldyńǵy shepten tabylǵan. Áskerı daıyndyǵy kem, áli myltyqtyń tútinin ıiskep úlgermegen saryaýyz balapan ispetti órimdeı jastar ajal apanyna toǵytylǵan kezde bulardyń vzvody tegis qaza bolsa kerek. «Kebin kıgen kelmeıdi, kebenek kıgen keledi» degendeı, kórer jaryǵy, tatar dámi taýsylmaǵan bolýy kerek, jalǵyz ózi tiri qalypty. Ýaqyt tabymen sarǵaıǵan esteliginen oqyp kórdik. Ardager bylaı jazypty. «Biz vagonnan túsisimen ıt tumsyǵy ótpeıtin qalyń ormanǵa bettedik. Komandırlerimiz bizdi jol-jónekeı bólip jatty. Al men pýlemetshiniń qasynan tabyldym. Maıdanǵa barar aldynda Semeıde bir aı pýlemetshilerdiń oqýyn oqydym ǵoı. Vzvod komandıri únemi qasymyzda boldy. Álden ýaqytta qarsha jaýǵan oqtyń astynda qaldyq. Barlyq vzvod qaza tapty. Jalǵyz-aq men tiri qaldym».
Maıdanger budan ári birinshi Prıbaltıka maıdanynda basqynshy jaýmen shaıqasqan. Ásirese Kenısberg tóńiregindegi qyrǵyn urysqa qatysqan. Jaýdyń tankisimen jekpe-jek qalǵan Kazımır Borısovıch qaısarlyqtyń úlgisin kórsetken. Maıdan dalasynda eki ret jaralanypty. Jarylǵan snarıadtyń jaryqshaǵy jaýyngerdi julyndaı ushyrǵanymen, emdelip, qaıtadan qatarǵa qosylǵan. Maıdan dalasyndaǵy erligi úshin birinshi dárejeli «Otan soǵysy» ordenimen, «Erligi úshin» medalimen marapattalǵan.
Maıdannan soń Ýkraınanyń temirjol salasynda mashınıstiń kómekshisi bolyp birer jyl eńbek etken. Keıin týǵan topyraǵy Qazaqstanǵa oralǵan. Tyń jáne tyńaıǵan jerlerdi ıgerýge qatysqan. Zeınet demalysyna shyqqansha eńbekten qol úzbegen. Taǵy da aq qaǵazǵa túsirgen soǵystyń sońǵy soldatynyń jazbalaryna úńildik. «Syzdy okopta saqyldaǵan sary aıaz súıegimizge deıin jetip jatqanda, beıbit aspannyń tańy jadyraı bir jylytady-aý degen úmit medet bolatyn».
Búgingi jurt ajaldy, azapty shaqtaǵy qorǵasyn oq qarsha boraǵanda syzdy okopty panalaǵan bozdaqtardyń aıaýly armanyn umytpasa eken.
Kókshetaý
