Palata spıkeri sportshylarǵa iltıpat bildire kelip, Astana Indoor Meet for Amin Tuyakov Prizes jarysymen World Athletics Indoor Tour Gold saıystar serııasynyń bıylǵy kezeńi bastalatynyn atap ótti. Irgeli týrnırdiń ózge kezeńderi Serbııa, AQSh, Chehııa, Germanııa, Fransııa, Polsha, Ispanııa sııaqty elderdegi toǵyz qalada ótkiziledi. Álemdegi eń úzdik jeńil atletter baq synaıtyn bul básekeni naǵyz sport merekesi deýge tolyq negiz bar.
Sonymen qatar M.Áshimbaev áıgili chempıondar men keleshegi zor jas talanttar qatysyp jatqan mundaı dodada aldyńǵy býyndy ulyqtaý sabaqtastyqtyń sımvoly ekenin tilge tıek etti. Ol mundaı qadam sportty álemdik deńgeıde dáripteýge aıtarlyqtaı yqpal etetinine jáne jas býyndy úlken maqsattarǵa jetelep, yntalandyra túsetinine nazar aýdardy. Sondaı-aq Senat tóraǵasy Qazaqstanda buqaralyq sportty damytýǵa Memleket basshysy basa mán berip otyrǵanyn aıtty.
«Qazirgi tańda Memleket basshysy Qasym-Jomart Toqaevtyń bastamasymen elimizde kásipqoı, áýesqoı, buqaralyq jáne ınklıýzıvti sport túrlerin damytý jolynda mańyzdy jobalar iske asyrylyp jatyr. Qazaqstanda Astana Indoor Meet for Amin Tuyakov Prizes sııaqty halyqaralyq bedeldi saıystardy ótkizý sol keshendi jumystyń naqty nátıjesi ekeni sózsiz. Atalǵan jarys áıgili jelaıaq, bilikti bapker, otandyq jáne álemdik jeńil atletıka tarıhynda erekshe oryn alatyn dańqty sportshy Ámın Tuıaqov júldesine arnalyp otyr. Osy kezeńmen álemdegi eń úzdik jeńil atletter synǵa túsetin World Athletics Indoor Tour Gold 2025 saıystar serııasy bastalady. Qatysýshylar arasynda Olımpıada jáne álem chempıondary bar. Sondyqtan osyndaı baıraqty básekege qazaqstandyq sportshylardyń da qatysýy – biz úshin zor maqtanysh. Aldaǵy ýaqytta bul halyqaralyq týrnır Qazaqstanda jeńil atletıkanyń damýyna tyń serpin beredi dep senemiz», dep M.Áshimbaev uıymdastyrýshylarǵa alǵys bildirdi.
Jarystyń ashylý rásimine Týrızm jáne sport mınıstri Erbol Myrzabosynov, Astana qalasynyń ákimi Jeńis Qasymbek, eńbek sińirgen sport sheberi, Eýropa chempıony, Eýropa Kýboginiń ıegeri jáne kóptegen dúbirli dodalarda top jarǵan ardager sportshy Ámın Tuıaqov, sondaı-aq Jeńil atletıka federasııasynyń prezıdenti, Olımpıada chempıony Olga Rypakova qatysty. Básekege 40 elden kelgen 110 sportshy qatysyp jatyr. Týrnırde el namysyn 44 atletimiz qorǵaıdy. Olardyń qatarynda ulttyq quramanyń kóshbasshylary da bar.
Baǵdarlamaǵa sáıkes áıelder – jeti (60 m, kedergiler arqyly 60 m, 400 m, 3000 m, bıiktikke sekirý, úsh qarǵyp sekirý, ıadro laqtyrý), al erler alty saıys boıynsha (60 m, kedergiler arqyly 60 m, 400 m, 1500 m, bıiktikke sekirý, uzyndyqqa sekirý) ózara myqtyny anyqtaıdy.
