Bıyl jetinshi ret ótetin forýmda Eýrazııalyq ekonomıkalyq odaq elderiniń ınnovasııalyq damý keleshegi talqylanady. Sıfrlyq damý, ınnovasııalar jáne aeroǵarysh ónerkásibi mınıstrligi Jasandy ıntellekt jáne ınnovasııalardy damytý komıtetiniń tóraǵasy Ǵızzat Baıtursynov Ortalyq kommýnıkasııalar qyzmeti alańynda ótken baspasóz máslıhatynda sıfrlyq forým barysynda jasandy ıntellektiniń ónerkásiptik ekojúıelerge ıntegrasııalaýyna qatysty keń kólemde aqparat usynylatynyn aıtty.
Sondaı-aq forýmnyń resmı bólimi EAEO elderi Premer-mınıstrleriniń dástúrli plenarlyq otyrysymen bastalady. Forýmǵa Ázerbaıjan, Belarýs, Qyrǵyzstan, Reseı, Tájikstan, О́zbekstan, Armenııa, Iran úkimetteriniń basshylary, sondaı-aq Eýrazııalyq ekonomıkalyq komıssııa basshylary qatysady. Úkimet basshylary sıfrlandyrýdyń negizgi jobalary, jasandy ıntellektini engizý jáne tehnologııalyq damýdyń birlesken vektorlaryna baılanysty memleketter arasyndaǵy máselelerdi talqylaıdy.
Innovasııalyq tehnologııalar parkiniń basqarýshy dırektory Danııa Ahmetovanyń aıtýynsha, «Digital Almaty 2025» forýmy jasandy ıntellektini damytý boıynsha ıdeıalar men jobalardy usynatyn negizgi alańǵa aınalmaq. Oǵan qatysýshylar ekonomıkany damytý úshin ozyq tehnologııalarmen tanysyp, ónerkásiptik ekojúıeler, qarjy salasy, ESG, medısına, bilim jáne kıberqaýipsizdik júıesine AI quraldaryn ıntegrasııalaýdyń keń múmkindigin qarastyrady.
Sonymen qatar forým aıasynda dástúrli «Digital Awards 2025» syılyǵy tabystalady. Sıfrlyq keńestikte eki kún boıy 60 myń dollardy enshileý úshin startaptar arasynda «AI Battle» baıqaýy ótedi. Jasandy ıntellekt salasyndaǵy eleýli jetistikter atalyp, «AI Movement» bastamasynyń qorytyndysy jarııa etiledi.
ALMATY
