Foto: Úkimettiń baspasóz qyzmeti
Jıynda Oljas Bektenov aldaǵy kezeńdegi jumystyń basty baǵyty azamattardyń turmys sapasyn jaqsartýǵa baǵyttalǵan ekonomıkanyń ósýin qamtamasyz etý ekenin atap ótti. Úkimet barlyq baǵyt boıynsha jedel sheshimderdi qabyldap, Prezıdent tapsyrmalarynyń ýaqtyly iske asyrylýyn qamtamasyz etetin bolady.
«Biz ınvestısııalardy tartý, salyq-bıýdjet saıasatyn jáne jer qoınaýyn paıdalaný salasyn reformalaý, elimizdiń básekelestik artyqshylyqtaryn kúsheıtý, iskerlik ahýaldy jaqsartý, ınfraqurylymdyq jáne energetıkalyq damý, sıfrlandyrýdyń tutas júıesin jáne halyqty áleýmettik qamsyzdandyrý júıesin qaıta qaraý baǵytynda belsendi jumys isteýimiz kerek. Ol úshin Úkimette ókilettikter jetkilikti. Mınıstrler men ákimder jedel sheshimder qabyldaýǵa jáne qoıylǵan mindetterdi iske asyrýǵa tolyq jaýapty bolýǵa tıis», dedi Úkimet basshysy.
Premer-mınıstrdiń aıtýynsha, Memleket basshysynyń Úkimettiń keńeıtilgen otyrysynda aıtqan árbir baǵyt boıynsha naqty nátıje qajet.
Investorlardyń naqty máselelerin sheshýmen aınalysyp, áýre-sarsańǵa salmaı, kerisinshe – kásipkerlerdiń kelýine, damýyna, zaýyttar, kásiporyndar, óndirister salýyna kómektesý kerek. Árbir basshy muny óz jumysynyń basty qaǵıdaty dep bilýi tıis. Tek naqty jumys qajet. Eski, bıýrokratııalyq jumys ádisterin, formalızmdi qoldana otyryp, jańa jaǵdaılarda oń nátıjege qol jetkizý múmkin emes. Memlekettik organdarǵa Memleket basshysy júktegen mindetterdi sapaly oryndaýǵa kóńil bólýdi, basy artyq qaǵazbastylyqsyz jáne kópke sozbaı batyl sharalar qabyldaýdy tapsyramyn. Bizdiń bárimizden naqty nátıje kútip otyr», dedi Oljas Bektenov.
Oljas Bektenov bıýdjettik tártipti qatań nyǵaıtýǵa jáne memlekettik bıýdjetti basym baǵyttar boıynsha teńgerimdi bólýge basa nazar aýdara otyryp, jumystyń birinshi kezektegi birqatar baǵytyna nazar aýdardy.
