Úzdikter sanatynan tys qaldy
Melbýrnde elimizdiń tennısshileri arasynan Elena Rybakına eń táýir nátıje kórsetti. Álemdik reıtıngte jetinshi orynda turǵan jerlesimiz alǵashqy aınalymdarda aýstralııalyq Emerson Djons pen amerıkalyq Iva Iovıchti jolynan yǵystyrdy. Úlken alamanǵa endi ǵana qosylǵan jas oıynshylar saqa sportshyǵa jarytyp qarsylyq kórsete alǵan joq. E.Rybakına 16 jasar Djonsty 6:1, 6:1 esebimen tas-talqanyn shyǵarsa, 17 jastaǵy Iovıchti 6:0, 6:3 esebimen oısyrata utty. Úshinshi kezeńde onyń joly WTA reıtınginde 33 satyǵa jaıǵasqan Daıana Iаstremskaıamen qıysty. Ýkraınanyń ókili byltyr dál osy jarysta jartylaı fınalǵa deıin jetken. Degenmen Elenaǵa Iаstremskaıany eńserý aıtarlyqtaı qıyndyq týǵyzǵan joq – 6:3, 6:4.
Tórtinshi kezeńde Elena Medıson Kızben kezdesti. 29 jastaǵy AQSh tennısshisi qazirgi kezde úzdikter tiziminde 17-orynda tur. Kezinde ol US Open dodasynyń fınaly, Rolan Garros pen Aýstralııa ashyq birinshiliginiń jartylaı fınalynda oınady. WTA týrnırlerin san márte utty. Bul joly Elena óz deńgeıinde óner kórsete almady. Báseke 6:3, 1:6, 6:3 esebimen Kızdiń paıdasyna sheshildi. Sóıtip, Elena Rybakına shırek fınalǵa shyǵa almady.
Keıingi kezde qarqynyn kúrt kúsheıtken 30 jastaǵy Iýlııa Pýtınseva bul kúnderi WTA reıtınginde 23-orynda. Bul – onyń sporttyq mansabyndaǵy eń úzdik kórsetkish. Tipten, óziniń jalyndap turǵan shaǵynda Iýlııa mundaı bıikke kóterilgen joq. Sol sebepti de biz elimizdiń ekinshi raketkasy alysqa shabady dep topshyladyq. Alaıda ol úshinshi aınalymda súrindi. Bastapqy básekelerde armenııalyq Elına Avanesıan (WTA №41) men qytaılyq Chjan Shýaıǵa (WTA №204) shań qaptyrǵan Pýtınseva reseılik Darıa Kasatkınanyń (WTA №10) osal tusyn taba almady – 5:7, 1:6.
Elimizdiń erler quramasynyń músheleri jasyl qurlyqta tym súreńsiz óner kórsetti. Jarys jolyna shyqqan qos Aleksandr – Býblık pen Shevchenko tusaýkeser kezdesýlerinde súrindi. Býblık (ATR №37) ózimen deńgeıles oıynshy, argentınalyq Fransısko Serýndolodan (ATR №31) aılasyn asyra almady – 6:7, 3:6, 2:6. Shevchenkoǵa (ATR 77) tym azýly qarsylasqa tap boldy, álemniń burynǵy birinshi raketkasy Karlos Alkaraspen (№3) kúsh synasty. 21 jastaǵy Ispanııanyń maqtanyshy ár jyldary US Open (2022 jyly), Ýımbldon (2023, 2024), Rolan Garrosta (2024) bas júldeni oljalady. Byltyrǵy Parıj Olımpıadasynyń kúmis medalin moınynda jarqyratty. Pıreneı túbeginiń túlegi Shevchenkony ońaı utty – 6:1, 7:5, 6:1.
Kız ben Sınner ozdy
Aýstralııa ashyq birinshiliginiń áıelder arasyndaǵy fınaldyq saıysynda álemniń birinshi raketkasy, belarýstik Arına Sobolenko men amerıkalyq Medıson Kız kúsh synasty. Bul básekede AQSh tennısshisiniń baǵy jandy – 6:3, 2:6, 7:5. Sóıtip, Kız óz mansabynda tuńǵysh ret «Úlken dýlyǵa» týrnırinde jeńimpaz atandy.
Erler arasyndaǵy jarystyń shırek fınalynda ıspanııalyq Karlos Alkarasty utqannan keıin serbııalyq Novak Djokovıchti eshkim toqtata almaıtyndaı kórinip edi. Germanııalyq Aleksandr Zverevke qarsy oıyn kezinde onyń jaraqaty syr berdi. Desek te Novak namysqa tyrysty. Birinshi set taı-breıkke deıin ulasyp, sál ǵana basymdyqpen nemis tennısshisi jeńiske jetti – 7:6. Jaraqaty janyna batsa kerek, Djokovıch úzilisten keıin básekeni jalǵastyrýdan bas tartty.
Kelesi jartylaı fınalda ıtalııalyq Iаnnık Sınner men amerıkalyq Ben Shelton arasynda ótti. Bul tartysta Apennın túbeginen kelgen arlannyń mysy basym boldy – 7:6, 6:2, 6:2. Fınalda Sınner Zverevke esh múmkindik bermedi – 6:3, 7:6, 6:3. Sóıtip, Italııanyń saıypqyrany qatarynan ekinshi ret Aýstralııanyń ashyq birinshiliginde teńdessiz dep tanyldy. Byltyr Sınner sheshýshi básekede reseılik Danııl Medvedevti qapy qaldyrǵan bolatyn.
Jerlesterimizdiń tabysy – 670 220 dollar
Melbýrnde jerlesterimiz sátsiz óner kórsetkenine qaramastan, qarjylaı jaǵynan oljaǵa keneldi. Máselen, elimiz tennısshileri arasynan eń úzdik nátıje kórsetip, tórtinshi aınalymǵa deıin jetken Elena Rybakına 260 400 AQSh dollaryn enshiledi. Úshinshi kezeńde kúsh synasqan Iýlııa Pýtınsevanyń esepshotyna 192 200 dollar aýdaryldy. Qos Aleksandrdyń, Býblık pen Shevchenkonyń tabysy – 94 240 dollar.
Juptyq jáne aralas juptar arasyndaǵy básekede baq synaǵan Anna Danılına 16 740 dollar qaltaǵa basty. Nıderlandtyq Robın Hasemen jup qurǵan Aleksandr Nedovesov 12 400 dollar ıelendi. Bas júldeni oljalaǵan tennısshiler 2 198 928 dollar syıaqy alsa, fınalda utylǵan oıynshylarǵa 1 214 810 dollar buıyrdy.
Tarıhy baı týrnır
Bıyl Aýstralııanyń ashyq birinshiligine týra 120 jyl toldy. Tusaýkeser saıys 1905 jyly uıymdastyrylǵan edi. Tuńǵysh týrnırdiń bas júldesin jergilikti qos tennısshi Rodnı Hıt pen Artýr Kertıs ózara sarapqa salyp, alǵashqysy jeńis toıyn toılady. HH ǵasyrdyń alǵashqy jartysyndaǵy úzdik nátıjeler úsh oıynshyǵa tıesili. Atap aıtsaq, Djek Kroýford (1931–33, 1935 jyldary) tórt ret top jarsa, Djeıms Anderson (1922, 1924–25) men Adrıan Kvısttiń (1936, 1940, 1948) úsh márte mereıi ústem boldy. Alpysynshy jyldary Roı Emersonnyń aldyna jan salmady (1961, 1963–67).
Melbýrnde eń kóp oljaǵa kenelgen – Novak Djokovıch. Serbııanyń sańlaǵy 10 jarysta jeńimpaz atandy (2008, 2011–13, 2015–16, 2019–21, 2023). Shveısarııanyń marqasqasy Rodjer Federerge sol ataqtyń altaýy buıyrdy (2004, 2006–07, 2010, 2017–18). Ispanııanyń dúldúli Rafael Nadal (2009, 2022) eki dodada dara shyqty. Sol úshtik bir-birimen taıtalasyp júrgen shaqta basqa oıynshylar arasynan Sten Vavrınkanyń ǵana bas júldeni oljalaýǵa kúsh-jigeri jetti. Shveısarııanyń ekinshi raketkasy 2014 jylǵy týrnırde top jardy.
Atalǵan týrnırge áıelder 1922 jyly qosyldy. Alǵashqy eki jarysta Margaret Moýlsýorttyń (1922, 1923) mereıi ústem boldy. Sál keıinirek Dafna Akherstiń asyǵy alshysynan tústi (1925-26, 1928-30). Kóp uzamaı Nensı Ýınn-Bolton óziniń myqtylyǵyn moıyndatty (1937, 1940, 1946-1948, 1951). 60-70 jyldary Margaret Smıt-Korttyń dáýiri júrdi (1960-1966, 1969-1971, 1973). Bul tennısshilerdiń barlyǵy da – Aýstralııadan.
О́tken ǵasyrdyń aıaǵynda amerıkalyq Martına Navratılova (1981, 1983, 1985), germanııalyq Shteffı Graf (1988-1990, 1994), ıýgoslavııalyq Monıka Selesh (1991–93, 1996), shveısarııalyq Martına Hıngıstiń (1997–1999) ónerine tamsandyq. Jańa ǵasyrda Serena Ýılıamstyń aldyna eshkim túse alǵan joq. AQSh-tyń ataqty tennısshisi jeti dodada (2003, 2005, 2007, 2009, 2010, 2015, 2017) daralandy.
Áıelder arasyndaǵy osyǵan deıingi sońǵy eki jarys Arına Sobolenkonyń jeńisimen aıaqtaldy. Búgingi tańda álemniń birinshi raketkasy atanyp otyrǵan Belarýstiń betkeustary 2023 jyly fınalda E.Rybakınany utsa, 2024 jyly qytaılyq Chjen Sınvenge shań qaptyrdy.
Jerlesterimiz juptyq jarystarda jaqsy nátıje kórsetti. 2020 jyly Mıhaıl Kýkýshkın men Aleksandr Býblık jartylaı fınalǵa deıin jetti. Bul mejede olar amerıkalyq Radjıv Ram men ulybrıtanııalyq Djo Solsberıge jol berdi. 2022 jyly brazılııalyq Beatrıs Haddad Maııamen jup qurǵan Anna Danılına fınalda chehııalyq Barbora Kreıchıkova men Katerına Sınıakovaǵa ese jiberdi.
