Halyqaralyq kórme aıasynda Ulybrıtanııanyń oqý ordalarymen iskerlik kezdesýler ótti. Atap aıtsaq, Satbayev University rektory Meıram Begentaev bedeldi brıtandyq University of Glasgow-dyń ǵalamdyq yntymaqtastyq jónindegi dekany Moıra Bolandpen memorandýmǵa qol qoıdy. Osylaısha, «Mechanical Engineering and Management» mamandyǵy boıynsha «1+1» formatyna negizdelgen qos dıplomdy magıstratýra baǵdarlamasy júzege aspaq. Budan bólek, atalǵan oqý ordalarynyń oqytýshylary men zertteýshileri yntymaqtastyq aıasynda eki ýnıversıtette dáris oqı alady. Aıta keteıik, «University of Glasgow» 2025 jylǵy QS álemdik reıtınginde 78-orynǵa ıe jáne brıtandyq jetekshi zertteý ýnıversıtetterin biriktiretin «Russell Group» quramyna kiredi.
Atalǵan kórmede sondaı-aq University of Exeter-men memorandýmǵa qol qoıyldy. Yntymaqtastyq nátıjesinde, birneshe qos dıplomdy magıstratýra baǵdarlamasy quryldy. Bul «Mining & Minerals», «Climate», «Data Science», «Environmental Management» jáne «Geology» baǵyttaryn qamtıdy. Atalǵan baǵdarlamalarǵa Satbayev University stýdentteri atsalysyp, birlesken ǵylymı jobalarǵa, onyń ishinde Exeter ýnıversıtetiniń «CREWW» jáne «Engineering Exeter» zerthanalarynda júrgiziletin zertteýlerge qatysa alady.
Osylaısha, University of Glasgow jáne University of Exeter-men jasalǵan eki seriktestik Satbayev University stýdentteri men oqytýshylary úshin jańa múmkindikter esigin ashyp, elimizdegi ǵylym men tehnologııalardyń damýyna yqpal etedi.
Atalǵan kórmede Nazarbayev University «Soyle App», qazaq tiliniń úlken tildik modeli «ISSAI KAZ-LLM» jáne «Artisan Education» startaptaryn tanystyrdy. Túsindirip ótsek, «Soyle App» aýyzsha sóz ben jazbasha mátindi tórt tilge (qazaqsha, oryssha, aǵylshynsha, túrikshe) aýdarý múmkindikterin usynady. Aýdarma sapasy «Google Translate», «Yandex Translate» nátıjelerinen asyp túsedi.
«Bett Show» 2025 kórmesinde ál-Farabı atyndaǵy Qazaq ulttyq ýnıversıteti «Faraby» sýperkompıýter, «Farabi Robotics» ortalyqtaryn tanystyrsa, L.N.Gýmılev atyndaǵy Eýrazııa ulttyq ýnıversıteti qazaq tilinde emosıonaldy túrde dáris oqıtyn jasandy zerdeni kórsetti. Al D.Serikbaev atyndaǵy Shyǵys Qazaqstan tehnıkalyq ýnıversıteti Qytaı men Qazaqstan arasyndaǵy yntymaqtastyq aıasynda qurylǵan «Lý Ban sheberhanasy» atty erekshe bilim berý jobasyna basa nazar aýdardy. Bul joba stýdentter men oqytýshylardyń kásibı jáne ınjenerlik daǵdylaryn damytýǵa, oqytý úderisine ınnovasııalyq tehnologııalardy engizýge, dástúrli ınjenerlik pánderdi zamanaýı sıfrlyq jáne avtomattandyrylǵan tehnologııalarmen úılestirýge baǵyttalǵan. Bilim kórmesinde Safı О́tebaev atyndaǵy Atyraý munaı jáne gaz ýnıversıteti stýdentteri men ǵalymdary «VR vırtýaldy ken orny» tehnologııasyn tanystyrdy. VR tehnologııanyń kómegimen stýdentter vırtýaldy ortada túrli ken oryndaryn zerttep, teorııalyq bilimderin bekite alady. Jobanyń artyqshylyǵy – qaýipsiz eksperımenttik orta, vırtýaldy ekskýrsııalar, ınteraktıvti jáne ımmersıvti oqý úderisi. Utebayev University atalǵan kórmede túrli elderden kelgen bilim jáne tehnologııa salasynyń mamandarymen tanysyp, yntymaqtastyq ornatý maqsatynda dıalog júrgizdi.
Aıta keteıik, atalǵan kórmege «Google», «Microsoft», «Lenovo» syndy 600-den astam halyqaralyq kompanııalar men 300 spıker qatysty. Sondaı-aq 130-ǵa jýyq memleket bilim salasyndaǵy óz ázirlemelerin usyndy.
