Foto: Parlam.kz
«Investorlardyń máselesin shuǵyl sheshý úshin ınvestısııa shtaby quryldy. Sonyń arqasynda bıýrokratııalyq kedergiler men quqyqtyq qarama-qaıshylyqtar joıylyp, keıbir jobalardy tezirek júzege asyrýǵa jol ashyldy. Alaıda basty maqsat – «jekelegen» problemalardy ǵana sheshpeı, eldegi tutas ınvestısııalyq ahýaldy jaqsartý», dedi Prezıdent.
Bizdiń Úkimetke jetpeı jatqan bir is bolsa – osy. Ár jer, ár óńirde nátıjeli jumys bar. Biraq máselege tutas qaraý, ortaq sheshimder qabyldaý, mınıstrlikter jumysyn birlese otyryp úılestirý jaǵy jetispeıdi. Muny Memleket basshysy qadap turyp aıtty.
«Investısııalyq jobalardy ázirleý barysynda vedomstvoaralyq úılestirýge áli de kóp ýaqyt ketedi. Úkimet basy artyq bıýrokratııadan arylyp, jedel jumys isteýi kerek», dedi.
Syrttaı qarasańyz, Úkimet jappaı jumylyp jumys istep jatqan sııaqty. Apta saıyn Úkimet otyrysy ótedi. Premer-mınıstr tapsyrma beredi. Shapqylap júrgen bir adam. Al nátıje qandaı? Berilgen tapsyrma oryndaldy ma? Oryndalmasa nege oryndalmady? Suraý joq sekildi. Tapsyrmalar bar. Tııanaqty oryndaý jaǵy az. Suraý, baqylaýǵa alý, óz mindetterin durys atqarmaǵandardy jaýapqa tartý jaǵy baıqalmaıdy. Osy qalyppen kete bersek, bári jaı ásheıin sóz túrinde qalady. Sondyqtan «belbeýdi býýǵa bel kerek». Jedel sheshim qabyldaýǵa er kerek. Jaýapkershilikti óz moınyna ala bilý degen talap ornyqsa deımiz.
Osy ýaqytqa deıin ekonomıkany damytý úshin «klaster kerek» dedik. Odan keıin «ınnovasııa kerek» dedik. Sosyn «ındýstrıalızasııa kerek» dedik. Qansha mıllıard qarjy ketti sonyń bárine. Jaýap bergen bireý bar ma?
Prezıdent taǵy da qaıtalap aıtyp jatyr: «Memlekettik qyzmetshilerdiń qulyqsyzdyǵy jáne jaýapkershilik alýdan taısalýy kelisý rásimderi men sheshim qabyldaýdyń tym uzaqqa sozylýyna sebep bolyp otyr. Muny ashyq aıtqan abzal».
Qulyqsyzdyqtan qalaı qutylamyz? Jaýapsyzdyqty qalaı retteımiz? Derbes sheshim qabyldaýǵa qashan kóshemiz? Úkimettiń endigi jumys sapasy eń aldymen osy saýaldarǵa jaýap berýine tikeleı baılanysty.
Nurtóre JÚSIP,
Senat depýtaty
