Sýret: kisi.kz
Byltyr elimizde júk tasymaldaý kólemi 10%-ǵa artyp, Úkimettiń esebine sáıkes, bul shamamen 1 mlrd tonnany quraǵan. Ásirese Transkaspıı baǵytyndaǵy konteınerlik tasymaldaý sektory 2,7 esege ósken. Demek jahandyq logıstıkalyq tizbekterdiń negizine aınalyp otyrǵan kólik arterııalary serpindi damý ústinde.
Jaqynda ǵana Qashaǵan ken ornynan Kaspıı teńizi arqyly Aqtaý-Baký baǵyty boıynsha alǵashqy munaı partııasy jóneltildi. Bul energetıkalyq baǵyttardy ártaraptandyrýdaǵy mańyzdy qadam boldy. Joba Transkaspıı baǵytynyń áleýetin nyǵaıtýǵa jáne jahandyq logıstıkalyq jeliniń negizgi elementi retinde aımaqtyń mańyzdylyǵyn arttyrýǵa kómektesedi.
Infografıkany jasaǵan – Amangeldi Qııas, «EQ»
Dúnıejúzilik banktiń boljamyna súıensek, 2030 jylǵa qaraı orta dáliz negizinde Kaspıı teńizi arqyly tasymaldaý kólemi úsh ese artyp, 11 mln tonnany quraıdy. Onyń 4 mln tonnaǵa jýyǵy konteınerlerde tasymaldanady. Tranzıttik júkterdiń negizgi bóligi Eýropa men Qazaqstan arasyndaǵy, sondaı-aq Eýropa men Qytaı arasyndaǵy saýdanyń bir bóligi retinde osy baǵyt arqyly ótedi.
Mundaı órshil maqsattarǵa qol jetkizý úshin kólik ınfraqurylymyn jetildirýdi jalǵastyrý qajet. Logistics Performance Index (LPI) reıtınginiń «kólik ınfraqurylymy» qosalqy ındeksinde Qazaqstan 2018 jylǵy baǵalaýmen salystyrǵanda pozısııasyn jaqsartqan. Iаǵnı 138 eldiń arasynda 80-orynǵa ıe boldy (2018 jyly 81-oryn). Degenmen pozısııalardy odan ári nyǵaıtý jáne júk tasymaly kóleminiń ósýin yntalandyrý úshin aıtarlyqtaı kúrdeli salym qajet. Eýropalyq qaıta qurý jáne damý bankiniń (EQDB) boljamdaryna sáıkes, Ortalyq Azııanyń kólik ınfraqurylymyn aıtarlyqtaı jaqsartýǵa qajetti ınvestısııanyń jalpy kólemi elimiz úshin 5,5 mlrd eýrony jáne jalpy aımaq úshin 18,5 mlrd eýrony quraıdy.
Kólik-logıstıkalyq ınfraqurylymyn odan ári damytý elimizdiń jahandyq naryqtaǵy básekege qabilettiligin nyǵaıtýda jáne onyń álemdik ekonomıkalyq úderisterde ıntegrasııasyn arttyrýda mańyzdy sanalady.
Erlan JAQYPOV,
Prezıdent janyndaǵy QSZI Jahandyq ekonomıka jáne turaqty damý bóliminiń basshysy
