Otandyq ónimdi qoldaý jalǵasady

Prezıdent byltyr qabyldanǵan «Energetıkalyq jáne kommýnaldyq ınfraqurylymdy jańǵyrtýǵa arnalǵan» ulttyq joba aıasynda jergilikti basshylar otandyq ónim shyǵarýdy qolǵa alýdy jalǵastyrý kerek dedi.

«Úkimet ınvestordy izdeýge, qoldaýǵa jáne qorǵaýǵa qatysty jumystyń bárin júıeli júrgizetin birtutas ekojúıe qurýy qajet. Bul jumys barlyq deńgeıde, ıaǵnı aımaqta, ortalyqta jáne shetelde birdeı atqarylýy kerek. Osy oraıda sheteldik jáne otandyq ınvestorlarǵa qatysty ustanym birdeı bolýy qajet. Memlekettiń qoldaýyna ıe bolǵan kompanııalarǵa tıisti talap qoıylýy kerek. Olar jumys oryndaryn saqtaýǵa, ón­diristi jańǵyrtýǵa tıis. Sonymen birge, ekologııa talaptaryn múltiksiz oryndaýǵa mindetti», dedi Prezıdent.

2024 jyly elimizdiń áleýmettik shyǵystarǵa bólgen negizgi qara­jaty jalpy shyǵystardyń37 %-yn qurady. Bul kórsetkishti 2026 jylǵa qaraı 44,7%-ǵa deıin ul­ǵaıtý josparlanǵan. Bul – aza­mat­tarymyzdyń áleýmettik qamsyz­dandyrylýy, densaýlyq saqtaý, mektep, balabaqsha jáne joǵary oqý oryndarynda tegin bilim alý, týrızm men sport. Iаǵnı mundaı qadam – halyqtyń ál-aýqatyn jaqsartýǵa jáne áleýmettik turaqtylyqty qamtamasyz etýge baǵyttalǵan saıası naýqannyń bir bóligi. Ekonomıkany damytýdyń naqty sektoryna 8,5% ǵana jumsalady. Onyń ishinde kásipkerlikti memleket tarapynan qoldaý sharalary, respýblıkalyq joldar qurylysy, ekologııa, sý resýrstary jáne joǵary qosylǵan qun, jumys oryndary men bıýdjet kiristerin qamtamasyz etetin jobalar. Al damyǵan elderde eko­­nomıkanyń naqty sektoryna jum­salatyn shyǵyndar shamamen 25%-dy quraıdy.

Sondaı-aq memleket tarapynan taǵaıyndalǵan áleýmettik kómek­tiń muqtaj jandarǵa esh qıyndyqsyz jetkizilýin tıisti qyzmet oryndaryna tapsyrý arqyly Memleket basshysy jem­qorlyqtyń qatań baqylaýda bola­­­tyn­dyǵyn jetkizdi. Halyqtyń áleýmettik ahýalyn jaqsartý úshin eń aldymen ekonomıkalyq ósim deńgeıin tómendetpeýimiz kerek. Sol máseleniń aınalysynda quzyrly organdar, memlekettik ákimshilik qyzmet­kerleri jáne basqa da sala maman­dary jumyla eńbek etýge tıis.

Bekbol Orynbasarov,

Senat depýtaty