Jol salasynyń sapasyn qadaǵalaýǵa jaýapty birden-bir mekeme ol – Jol aktıvteriniń ulttyq sapa ortalyǵy. Jaýapty mekemeniń negizgi mindetine jol salý, rekonstrýksııalaý, jóndeý, kútip ustaý jumysyn qadaǵalaý kiredi. Iаǵnı salynar joldyń qatparyna, tóselip jatqan jol qabatyna saraptama jasaıdy. Ár óńirde fılıaly bar mekemedegi ınspektorlar jyl saıyn 17 myń shaqyrymnan astam halyqaralyq jáne respýblıkalyq, oblystyq mańyzy bar joldarǵa dıagnostıka júrgizedi. Jol-qurylys materıaldaryna 220 túrli jan-jaqty zerthanalyq zertteý jasalady. Ortalyqtyń osynshama syn sadaǵynan sátti ótip, támamdalǵan sapaly jol álbette sapar júgin jeńildetedi.
Sol sebepti qurylysqa qajetti materıal da, tájirıbeli maman da – jolǵa kepil. Jol aktıvteri ulttyq sapa ortalyǵynyń Qaraǵandy oblysyndaǵy fılıalynyń jol ınjeneri Ásel Hasenova – jyljymaly jol zerthanasy arqyly óńirdegi jol salasyna eleýli úles qosyp júrgen jumysshy maman.
Jyljymaly zerthanada joldy tekserýge qajettiniń bári bar: jol datchıgi, geometrııalyq parametrlerdi ólsheý júıesi, tegistikti jáne kóldeneń tegistikti ólsheýge arnalǵan júıe, beınejazba, GPS, munymen qosa aqaýlardyń syzyqtyq ólshemderine deıin ólsheıtin qurylǵy. Munshama tehnologııanyń tilin tereń túsingen biregeı ınjener – ujymynda baǵaly maman.
Jasyrary joq, jalpy jol qurylysy salasynda maman tapshylyǵy degen másele óte ózekti bolyp otyr. Jol salyp jatqan merdiger kompanııalarda zerthana meńgerýshileri men jol-qurylys materıaldarynyń ınjenerleri jetispeıdi. Munymen qosa asfalt tóseýshi, jol tegisteıtin tehnıka, býldozer men avtogreıder operatorlary tapshy. Bilikti mehanızatorlar, geodezııa, kartograf mamandar, meteorologtar men mehanıkterdiń joqtyǵy jumys kúshin tejeıdi. Sol úshin ortalyqtyń qyzmetkerleri bos jumys orny jármeńkelerin qalt jibermeı, qatysady. Kolledj, ýnıversıtet túlekterimen kezdesip jastardy jumysqa tartady. Jol salasyna qyzyǵyp kelgenderdi Ásel sekildi jetekshi ınjener qýana qarsy alyp, bilgenimen bólisip, tehnologııanyń túrli tásilin úıretedi. Sóıtip saladaǵy bilikti maman sany jyl ótken saıyn ósip otyr.
Jetekshi sarapshy Ásel qazirgi qyzmetine deıin túrli salada qyzmet atqaryp keldi. Almatydaǵy Halyq sharýashylyǵy ýnıversıtetin qarjyger mamandyǵy boıynsha qyzyl dıplommen támamdaıdy. Sodan óziniń ómirlik jaryn jolyqtyryp, Qaraǵandyǵa qonys aýdarady. Qolyndaǵy qyzyl dıplomymen Qaraǵandy qalasynyń tergeý ızolıatorynyń esep bólimine jumysqa ornalasady. Osynda jemisti eńbek etip júrgen ol basqa jumysqa aýysýdy oılastyrady. Sol kezde qaıyn atasy Qarajal qalasyndaǵy jolǵa jaýapty mekemeni basqaryp turǵan kórinedi. Atasy aqyl aıtyp, nusqaý kórsetken soń «Kazahavtodor» mekemesine jumysqa turypty. «Osy kezden bastap jol qurylys salasy baýrady», – deıdi. Dáp osy jerde eńbek ete júrip, jol ınjeneri men zańger mamandyǵyn oqyp alypty. Qazir qos dıplomy, oqyǵan bilimi ózine úlken kómek. Ol jyl saıyn biliktilikti arttyratyn kýrstan da qalmaıdy. О́ıtkeni tehnologııa aı saıyn jańaryp, jańǵyryp otyrady.
Jol ınjeneri salaýatty ómir saltyn berik ustanady. Sporttyń túr-túrinen habary bar. Jyl saıyn ortalyqtyń barlyq óńirdegi fılıal qyzmetkerleri arasynda túrli sporttyq saıys uıymdastyrylady. Sonyń bárine belsendi qatysyp, óńirdegi qosynnyń qorjynyn júldege toltyryp júr. Voleıbol sekildi dop dodalary, doıby, tennıs sekildi taqtadaǵy tartysta da aldyna jan salmaıtyn qabileti bar.
Ásel – aıaýly jar, kelisti kelin, asyl ana. Shańyraǵyna shýaq shashyp otyrǵan onyń kóziniń aǵy men qarasyndaı bolǵan qos qulyny bar. Otaǵasy jeke kásippen aınalysady. Otbasyndaǵylar bilikti jol qurylys ınjenerine úlken qoldaý kórsetedi. Jetistikterimen maqtanady, marqaıady. Áıtpese jaýapty jumystyń júgi aýyr. Bilikti ınjenerdiń jol salasyna sińirip júrgen eńbegi osyndaı jarqyn.
Qaraǵandy oblysy
