Buǵan deıin Mańǵystaýdyń Munaıly aýdanynda, Tobyl óńirindegi Rýdnyı qalasynda Beıimbet Maılın, Tólen Ábdik syndy ádebıet alyptarynyń shyǵarmashylyǵyna arnalǵan tórt birdeı baıqaý ótkizgen kásipker Rýdnyı qalasynda ótken «Ábish oqýlaryn» qorytyndylap, jeńimpaz oqýshylarǵa baǵaly syılyqtar tabys etti.
Jas oqyrmandar jarysyna Qostanaı, Rýdnyı qalalyq mektepteriniń 8-11 synyp oqýshylary qatysty. Barlyǵy – 89 bala baıqaýdyń birinshi kezeńinde halyq jazýshysy Ábish Kekilbaıulynyń shyǵarmalary boıynsha test saýaldaryna jaýap berdi. Odan iriktelip shyqqan 35 bala jazýshynyń «Báseke» povesiniń mazmunyn taldap, tarqatyp esse jazyp shyqty.
Baıqaý jeńimpazdary Rýdnyıdaǵy oqýshylar saraıynda marapattaldy. Jıyn barysynda atalǵan qurylys kompanııasynyń basshysy ózderi ótkizip otyrǵan «QC Read» jobasy aıasyndaǵy bilim jarysynyń mán-mańyzy jóninde aıtty.
«Ádette bıznes salasynda júrgen adamdar sportty, basqa da salalardy qoldap jatady. Kóbine bilimdi qoǵam qalyptastyrmaı elimiz ilgeri baspaıtyny eskerilmeıtini bar. Qandaı saıasat júrgizseńiz de, qandaı qarjylaı qoldaý jasasańyz da, bilim bolmaǵan jerde qoǵam da, adam da damymaıdy. Nege damyǵan memleketterdiń azamattary kóp oqıdy? Mysaly, Ulybrıtanııada adam sanyna shaqqanda bir adam kúnine on bet oqıdy eken. Sondyqtan bizdiń jobamyz negizinen oqıtyn jastardyń qatary kóbeıse eken degen nıetten týǵan. Baıqaýda 89 oqýshy baq synady. Bul da jaman emes. Endi Oralhan Bókeıdiń shyǵarmashylyǵyn dáripteýdi kózdep, Katonqaraǵaıda oqýshylardyń jazǵy lagerin uıymdastyrýdy oılastyryp jatyrmyz. Maqsat – oqıtyn balalardyń sanyn kóbeıtý. Oqýdy ádetke aınaldyrý. Oqıtyn bala lýdomanııa, nashaqorlyq degen jaman nárselerden boıyn aýlaq ustaıdy. Júzden júırik shyqqan jas oqyrman baǵaly syılyqtarǵa ıe bolady. Aldaǵy ýaqytta syılyq qoryn ulǵaıtyp, qarjylaı syılyqtar taǵaıyndaýdy jón kórip otyrmyz», dedi Nuralhan Ámirhanuly.
Kompanııa basshysy 89 balanyń ishinen ozyp shyqqan Jitiqara mektebiniń oqýshysy Asylzada Bereketovaǵa, Qostanaı qalasynan kelgen Dılıara Baǵlanqyzyna, rýdnyılyq Káýsar Qasymbek, Aıdana Naǵmetova, Nazken Kúzibaevalarǵa «Aıfon», «Aıpad» tárizdi baǵaly syılyqtar tabys etti.
Nuralhan Ámirhanuly aldaǵy ýaqytta Mirjaqyp Dýlatulynyń 140 jyldyǵyna arnalǵan jas oqyrmandar baıqaýyn uıymdastyrýdy kózdep otyr. Baıqaý jeńimpazdary Alash kósemderiniń kindik qany tamǵan Torǵaı óńirin aralap, Ahmet Baıtursynulynyń Sartúbektegi kesenesine, Bıdaıyqtaǵy Mirjaqyp Dýlatulynyń mýzeıi men kesenesine soǵatyn bolady.
Qostanaı oblysy
