Foto: ashyq derekkóz
2024 jyly respýblıka kóleminde 1026 mal urlyǵy tirkelgen. Bul aldyńǵy jylǵy jalpy urlyqtyń 3%-yn quraıdy. Atalǵan faktilerdiń jartysynan kóbi erkin jaıylymda jasalǵan. Polısııa 89 qylmystyq topty quryqtady. Olardyń quramynda 572 mal urysy bolǵan. Urlanǵan maldyń 4,5 myńnan astamy tabylyp, zańdy ıelerine qaıtaryldy.
«Jalpy qabyldanǵan keshendi sharalardyń arqasynda sońǵy bes jylda mal urlyǵy 64%-ǵa azaıdy. Qylmystyń osy túrimen kúresti kúsheıtý maqsatynda Ishki ister mınıstrligi basqa memlekettik organdarmen birlesip, zańnamalyq, uıymdastyrýshylyq jáne praktıkalyq sharalardy turaqty túrde júrgizedi», dedi polısııa departamenti bastyǵy Shyńǵys Alekeshev.
Spıkerdiń sózinshe, osyndaı qadamdardyń biri retinde aýyl sharýashylyǵy janýarlaryn jaıý erejelerin qabyldaýdy atap ótýge bolady. Sondaı-aq jaıylym erejelerin buzǵany úshin Ákimshilik quqyq buzýshylyq týraly kodekstiń 408-babyna sáıkes ákimshilik jaýapkershilik belgilengen. 2024 jyly 38,5 myńnan astam osyndaı buzýshylyq anyqtaldy. Odan bólek, mal urlyǵy úshin Qylmystyq kodekske jeke bap engizilgen. Onda múlki tárkilenip, 12 jylǵa deıin bas bostandyǵynan aıyrý jazasy qarastyrylǵan.
О́tken jyly mal urlyǵyna qarsy respýblıkalyq deńgeıde 2 is-shara, óńirlik deńgeıde 76 is-shara ótkizilgen.
Al bıylǵy jyldyń qańtar aıynda elimizde 69 mal urlyǵy tirkeldi. 53 kúdikti ustaldy. 10 qylmystyq top áshkerelendi. Urlanǵan 450 maldyń 134-i ıelerine qaıtaryldy.
Maldy qylmystyq qol suǵýshylyqtan qorǵaý úshin mınıstrlik qarapaıym erejelerdi saqtaýdy usynady. Máselen, maldy qaraýsyz qaldyrmaý, GPS-trekerlerin ornatý, malǵa en salyp, tańbalaý jáne chıpteý – kóptegen urlyqtyń aldyn alatyn is-áreketter.
