- Konkıden elimizdiń jasóspirimder quramasynyń múshesi Alına Daýranova Italııanyń Kollabalbo qalasynda jalaýy jelbiregen Álem kýboginiń kezeńdik saıysynda altynnan alqa taqty. 1 000 metrlik qashyqtyqqa máre syzyǵyn birinshi bolyp qıyp ótti. Kúmis, qola medaldy ıtalııalyq Meıbrıt Vıgl men norvegııalyq Inna Naken enshiledi. Quramynda Alena Lıfatova, Alına Daýranova, Arına Ilıashenko syndy burymdylary bar elimizdiń komandasy sprıntte de aldyna jan salmady. Ekinshi, úshinshi orynda – Italııa men Norvegııa quramalary. Kelesi kúni Alına óz jankúıerlerin taǵy da qýantty. 500 metrlik básekede majarstandyq Hanna Bırodan ǵana qalyp qoıyp, kúmis medaldy moınynda jarqyratty.
- Kanadanyń Val-Sent-Kom kýrortynda frıstaıl-mogýldan Álem kýboginiń kezeńdik básekesiniń shymyldyǵy túrildi. Jarysta Anastasııa Gorodko óte jaqsy óner kórsetti. Jartylaı fınalda Fransııanyń maqtanyshy, Olımpııa oıyndarynyń jeńimpazy, álemniń bes dúrkin chempıony Perrın Laffondy artqa tastaǵan 19 jastaǵy jerlesimiz sheshýshi tusta AQSh arýy, Beıjiń Olımpıadasy men álem chempıonatynyń úsh dúrkin kúmis júldegeri Djeılın Kaýfke ese jiberdi. Iýlııa Galysheva 9-orynǵa turaqtasa, Aıaýlym Ámrenova 13-satyǵa taban tiredi.
- Fýtzaldan 2026 jyly ótetin Eýropa chempıonatynyń irikteý týrnırinde elimizdiń quramasy oıda joqta Danııadan utylyp qaldy. Sıonnerborgte ótken báseke 3:2 esebimen aıaqtaldy. 27-mınýtta Adam Fogt alań ıelerin alǵa shyǵarsa, 31-mınýtta Narýn Serikov tarazy basyn teńestirdi. 34, 38 mınýttarda Mohammed Iýssef qatarynan eki ret nysanany dál kózdedi. Match aıaqtalar tusta Dáýren Tursaǵulov esep aıyrmashylyǵyn qysqartty. Qazirde jerlesterimiz jarys kestesinde ekinshi orynda tur. Qorjynymda – 4 upaı. 7 upaı enshilegen Armenııa kósh basynda, Albanııa men Danııada 3 upaıdan bar.
- Astanada Devıs kýbogi álemdik tobynyń pleı-off kezeńi aıasynda Qazaqstan – Pákistan quramalary kúsh synasty. Bul básekede elimizdiń tennısshileri aıqyn basymdyq tanytty. Jekelegen saıysta Aleksandr Shevchenko Mýzamıl Murtazaǵa (6:2, 6:1) shań qaptyrsa, Beıbit Juqaev Hýzaıf Abdýl Rehmannan (7:5, 6:0) basym tústi. Kelesi kúni juptyq synda Aleksandr Shevchenko/Tımofeı Skatovtyń Akel Han/Mýzamıl Murtazadan (6:4, 7:6) mereıleri ústem boldy. Sóıtip, Pákistandy 3:0 esebimen utqan jerlesterimiz atalǵan jarystyń I Álemdik tobyna qaıta joldama aldy.
- Bul kúnderi sporttyq gımnastıkadan elimizdiń quramasy Qatardyń bas shahary – Dohada oqý-jattyǵý jıynyn ótkizip jatyr. Bıylǵy maýsymnyń tusaýkeser týrnıri 20-23 aqpan aralyǵynda Germanııanyń Kotbýsinde ótedi. Odan keıin naýryz aıyndaǵy Álem kýboginiń kezeńdik saıystaryn Baký men Antalıa qabyldaıdy. Alǵashqy eki dodada Mılad Karımı, Dmıtrıı Patanın, Ilııas Ázızov, Zeınolla Ydyrysov óner kórsetedi. Úshinshi kezeńde olardyń qataryna Narıman Qurbanov qosylady. Olımpııa oıyndarynyń kúmis júldegeri qazirgi kezde Pragada jeke baǵdarlamamen daıyndalyp jatyr.
- Fýtboldan ÝEFA Chempıondar lıgasynyń pleı-off saıystarynyń jerebesi tartyldy. Úzdikter sanatyna qosylý jolynda myna klýbtar ózara sheberlik baıqasady: «Brest» – «PSJ», «Monako» – «Benfıka», «Iýventýs» – PSV, «Feıenoord» – «Mılan», «Manchester Sıtı» – «Real», «Seltık» – «Bavarııa», «Brıýgge» – «Atalanta», «Sportıng» – «Borýssııa». Jalpy kezeńde 1-8 oryndardy ıelengen «Lıverpýl», «Barselona», «Arsenal», «Inter», «Atletıko», «Baıer», «Lıll», «Aston Vılla» birden 1/8 fınalǵa joldama aldy. Jańa formatta ótip jatqan dop dodasynda sátsiz oınaǵan «Dınamo» (Zagreb), «Shtýtgart», «Shahter», «Bolonıa», «Srvena Zvezda», «Shtýrm», «Sparta», «Leıpsıg», «Jırona», «Zalsbýrg», «Slovan», «Iаng Boız» jarys jolynan shyǵyp qaldy.
- Elimizdiń eń úzdik tennısshisi Elena Rybakınany endi ıtalııalyq maman Davıde Sangvınettı jattyqtyratyn boldy. Bul aqparatty ǵalamtor arqyly elimizdiń birinshi raketkasynyń ózi taratty. 52 jastaǵy Apennın túbeginiń ókili 1993–2003 jyldar aralyǵynda túrli týrnırge qatysty. ATR reıtınginde 42-orynǵa deıin kóterildi. 1998 jyly Ýımbldonnyń shırek fınalynda óner kórsetti. Keıinnen bapkerlik qyzmetke aýysyp, Vınsent Speıdı, Go Soeda, Dınara Safına syndy tanymal oıynshylardy jattyqtyrdy.
