Elordada Qazaqstannyń halyq ártisi, dáýlesker kúıshi-kompozıtor Dına Nurpeıisovany ulyqtaý is-sharasy ótip, óner merekesi kúıshiniń eńseli eskertkishine gúl shoqtaryn qoıý rásiminen bastaldy.
Munan soń E.Rahmadıev atyndaǵy memlekettik fılarmonııanyń kameralyq zalynda «Dına – kúı anasy» atty konsert ótti. Onyń álqıssasynda kúıshi haqynda eski kadrlardan ańyz tulǵanyń bet-beınesi kórermenge kórsetildi. Qazaq orkestriniń bas dırıjeri Aıtqalı Jaıymovtyń jetekshiligimen kúı anasynyń irgeli muralary tyńdarmanǵa jetti. «Toıbastardan» bastalyp, «Kerbez» kúıimen qostalǵan adýyn kúıler ótken ǵasyrdaǵy qazaq janynyń, ult rýhynyń ótken-ketkenin sazǵa qosqandaı. Sonymen qatar Qazaqstannyń eńbek sińirgen qaıratkeri Anar Muzdahanova «Baıjuma», Muhıt Salybekov «Shynar», Estaı Aıtqulov «Qara qasqa at», Saǵı Baımuhat «Ana», Aıym Bekbaeva «Bulbul» kúıin oryndap, kópshiliktiń kózaıymyna aınaldy. Al «On altynshy jyl» kúıi qazaqtyń qaıtpas minezin, berik jigerin, azattyqty kóksegen arman-tilegin ańǵartyp, jigerimizdi janydy.
«Dına ájemizdiń ónerine kezinde búkil Máskeý qol soqqan. Shynynda, 76 jasynda úlken sahnaǵa alǵash ret shyqqan kúıshi erekshe adam bolǵan. Kezinde Ahmet Jubanovtyń uıytqy bolýymen
Dına Nurpeıisovany sonaý alys aýyldan Almatyǵa aldyryp, o kisini qazaq ıntellıgensııasy kútip alǵan eken. Sahnaǵa shyǵaryp kúı tartqyzǵanda erekshe tamsanǵan Aqań burynǵy kúıshilerden ájemizdiń tartysy erekshe ekenin moıyndaıdy. Ásirese Qurmanǵazynyń «Tóremuratyn» tartqanda oń qoly sahnaǵa syımaı ketti dep jazady. Osy arqyly Dına Nurpeıisovanyń asqan sheberligin, ustazyn nasıhattaýdaǵy eńbegin, kisilik úlgisin kórsetken», dedi kúıshi, ustaz, Qazaqstannyń eńbek sińirgen qaıratkeri Aıtjan Toqtaǵan.
Qalalyq mádenıet basqarmasy, E.Rahmadıev atyndaǵy fılarmonııa jáne respýblıkalyq «Kúı anasy» qory uıymdastyryp otyrǵan is-sharada Dına Nurpeıisovanyń ómiri men shyǵarmashylyǵy keńinen dáriptelip, mýzykalyq murasyna qurmet kórsetildi.
2021 jyldyń 3 shildesinde, kúıshi-kompozıtordyń týǵanyna 160 jyl tolýy qarsańynda «Dombyra kúni», «Kúı anasy» ataýymen respýblıkalyq qor qurylyp, jumys istep keledi. Qoǵamdyq qor Astana tórinen kúı anasyna arnap záýlim eskertkishtiń boı kóterýine bastamashy boldy. Al eskertkish janynan «Qazaq eliniń kúıshileri men kúıshi-kompozıtorlary» ataýymen alleıa ashylyp, el rýhanııatyn kúıshilik ónerimen baıytqan 101 kúıshiniń esimi mármárǵa qashalyp jazylǵan eskertkish tas boı kóterdi. Elimiz boıynsha 800-den astam mádenı is-shara uıymdastyrylyp, professor K.Sahabaevanyń «Ásemqońyr», professor T.Qýanyshevtyń «Kúı anasy», Qazaqstannyń eńbek sińirgen ártisi A.Úlkenbaevanyń «Dına Nurpeıisova» atty eńbekteri jaryq kórdi.
