Mádenı dáristi uıymdastyrýshy – mýzeıdiń pedagogıka jáne balalar shyǵarmashylyǵy bóliminiń ádisker mamany Laýra Myrzahmet: «Uly ustaz Farabıdiń kúlli adamzat ıgiligi úshin atqarǵan rýhanı eńbegi ushan-teńiz. Atap aıtsaq, tulǵanyń álemge áıgili eńbegi «Qaıyrymdy qala turǵyndary», «Mýzyka týraly» traktattary áli kúnge qunyn joıǵan joq. Ásirese álem tarıhynda tuńǵysh ret mýzykalyq dybystardy qaǵazǵa túsirip, nota paıdalanǵany zor jańalyq», dedi.
Jınalǵan qaýymǵa dáris júrgizgen L.N.Gýmılev atyndaǵy Eýrazııa ulttyq ýnıversıtetiniń professory, tarıh ǵylymdarynyń doktory Maqsat Alpysbesuly, uly ǵalymnyń ǵumyrnamalyq tarıhy men shyǵarmashylyq qýaty jaıly qyzyqty áńgime órbitip, tulǵanyń eńbegine toqtaldy.
«Úlken oqymysty ál-Farabı «árbir adamnyń dúnıede óz orny bar» dese, dana Abaı atamyz «sen de bir kirpish dúnıege, ketigin tap ta, bar qalan!», dep árkimniń óz orny bar ekenin tilge tıek etken. Jas urpaqtyń mindeti – izdenis jumysyn jalǵastyryp, bilim qoryn tolyqtyryp, tarıhymyzdyń qundylyǵyn dáleldeýge bar kúsh-jigerin salý bolsa, bizdiń mindetimiz – urpaqqa tereń bilim men tárbıe berý. Ál-Farabı babamyz biz úshin ǵylym-bilimge degen jankeshtiliktiń jáne jetistikke jetýdiń úlgisi», dedi tarıhshy ǵalym.
Sonymen qatar mýzeılik dáris barysynda uıymdastyrýshy tarap, kanýn (jetigen tıptes aspap), mızmar (sybyzǵy tıptes aspap), ýd, tanbýr, shahrýd (dombyra tıptes aspap), rabab (qobyz tıptes aspap), t.b. mýzykalyq aspaptardyń ereksheligine toqtalyp, olardyń dybystalyp oınalýy haqynda beınejazbalar usyndy. Sondaı-aq dáriske qatysýshylar kórmege qoıylǵan ǵulamanyń shyǵarmalarymen tanysty.
