- 25 aqpanda Almatyda PWL 8 týrnıri ótedi. Sol jarysta 86 kg salmaqtaǵy qazaqtyń belgili erkin kúres sheberi, eki dúrkin álem chempıonatynyń qola júldegeri, Azııanyń úsh dúrkin chempıony Azamat Dáýletbekov Magomedhabıb Kadımagomedovpen kúsh synasady. Ekeýiniń de jasy 30-da. Magomedhabıb Daǵystanda dúnıege kelgenimen, Belarýstiń namysyn qorǵap júrgenine birer jyldyń júzi boldy. Ol – Tokıo Olımpıadasynyń kúmis júldegeri, Álem kýboginiń qola júldegeri, Eýropa chempıony. Biraq bir aıta keterligi, bul tabystaryna Kadımagomedov 74 kg, 79 kg salmaq dárejelerinde óner kórsetip júrgen kezderinde qol jetkizdi.
- Halyqaralyq Shahmat federasııasy óz reıtıngin jańartty. Úzdikter sanatynda elimizdiń birneshe ókili bar. Áıelder arasynda Bıbisara Asaýbaevanyń (2 494 upaı) aıaqalysy qýantady. Elimizdiń eń úzdik oıynshysy klassıkalyq shahmattan 13-orynda tur. Rapıdte 9 (2 446 upaı), blıste 6 (2 441 upaı) satyǵa jaıǵasty. Qyzdardyń reıtınginde Merýert Kamalıdenova (2 355 upaı) 10, Ámına Qaıyrbekova (2 336 upaı) 13, Alýa Nurman (2 336 upaı) 14-oryndy enshiledi. Sondaı-aq Merýerttiń rapıd (4-oryn, 2 368) pen blıstegi (5-oryn, 2 324) nátıjeleri de táýir.
- 14–16 aqpan aralyǵynda Ázerbaıjannyń bas shahary – Bakýde ótetin Grand Slam týrnırinde elimizdiń úsh dzıýdoshysy beldesedi. Olar – Ádilbek Berikuly (66 kg), Islam Toqtasyn (81 kg), Qýanysh Rataev (100 kg).
- 27 jastaǵy kásipqoı boksshy Sadrıddın Ahmedov (15-0, 13 KO) óziniń kelesi kezdesýin 19 sáýirde AQSh-tyń Kalıfornııa shtatyndaǵy Kommers qalasynda «Latyn balasy» degen búrkenshik esimmen tanylǵan 34 jastaǵy Meksıkanyń marqasqasy Elıas Espadasqa (23-6, 16 KO) qarsy ótkizedi. Bul sol keshtiń basty jekpe-jegi bolmaq.
- Abý-Dabıde WTA-500 týrnıri bastaldy. Júlde qory 1 064 510 AQSh dollaryn quraıtyn dúbirli dodada elimizdiń eki tennısshisi baq synaıdy. Olardyń ekeýi de jarysty ekinshi kezeńnen bastaıdy. Elena Rybakına álemdik reıtıngte 68 orynda turǵan amerıkalyq Ketı Volynespen kezdesedi. Iýlııa Pýtınseva chehııalyq Marketa Vondroýsheva men ulybrıtanııalyq Emma Radýkaný arasyndaǵy básekeniń jeńimpazymen sheberlik baıqasady. Rotterdamdaǵy týrnırde Aleksandr Býblık baq synaıdy. Tusaýkeser kezdesýdegi onyń qarsylasy – Chehııanyń ókili Iаkýb Menshık. Dodanyń júlde qory 2,5 mıllıon dollardan asady.
- 13–18 aqpan aralyǵynda Taldyqorǵandaǵy «Jastar» sport saraıynda 22 jasqa deıingi boksshylar arasynda el chempıonaty uıymdastyrylady. Jekpe-jekter 13 salmaq dárejesinde ótedi. Jarysta aldaǵy ýaqytta ulttyq qurama komandanyń sapyna qabyldanatyn rezerv qarastyrylady. Bir aıta keterligi, buryn-sońdy elimizde osy jas ereksheligi boıynsha jarys ótpegen. Bul joba jańadan taǵaıyndalǵan aǵa jattyqtyrýshy, Olımpıada chempıony Baqyt Sársekbaevtyń jetekshiligimen júzege asyp jatyr.
- Kýveıttiń El-Kýveıt qalasynda stend atýdan elimizdiń quramasy oqý-jattyǵý jıynyn bastady. Oǵan ulttyq komanda sapyndaǵy 42 mergen qatysyp jatyr. Jıyn 13 aqpanda aıaqtalady.
