Statıstıkaǵa súıensek, elimizde «Instagram»-ǵa – 12,1 mln, «Facebook»-qa – 2,6 mln, al «TikTok»-qa 14,1 mln qoldanýshy tirkelgen. Sońǵy atalǵan platformanyń qazaq qoǵamyna qanshalyqty tamyr jaıyp úlgergenin osy derekten aıqyn ańǵaramyz. Buny qoldana alsań – ıgiligiń, qoldana almasań – qıǵylyǵyń. Sondyqtan jetkinshekti jetektegen jelide qyzyqty hám paıdaly kontenttiń óte-móte kóp bolǵany durys.
«Bul baıqaýdy úshinshi ret ótkizip otyrmyz. Jelidegi jarysqa qyzyǵýshylyqtyń jyl saıyn artyp kele jatqany aıqyn ańǵarylady. Atalǵan joba pedagogterdi shyǵarmashylyq tásilder izdeýge shabyttandyryp, bilim alýdy qyzyqty etip kórsetedi dep úmittenemiz. Vızýaldy jáne ınteraktıvti formattar ustazdarǵa aqparatty qoljetimdi ári tartymdy etip jetkizýge kómektesedi», dedi Ortalyq Azııadaǵy «TikTok» Operasııalyq bóliminiń basshysy Saıf Mýdjahıd.
Endi myńnan júırik shyqqan úsh jeńimpazdy tanystyryp óteıik. Baıbolat Seıdahan – matematıka pániniń muǵalimi. Ol qazaq tilinde mıllıondaǵan qaralym jınaıtyn beınejazbalar daıyndaıdy. Tanymaldylyǵynyń syry – kúrdeli esepterdiń sheshý joldaryn qarapaıym ári túsinikti etip túsindirýi, sondaı-aq logıkalyq tapsyrmalar usynýy. Baıbolat matematıkalyq bilimniń ómirdegi naqty máselelerdi sheshýge qalaı kómektesetinin kórsetip, teorııany praktıkamen ushtastyrady. Onyń basty maqsaty – matematıkany tek formýlalar jıyntyǵy emes, álemdi tanýdyń qyzyqty quraly retinde tanystyrý.
Al Evgenıı Solonısyn – oqýshylarǵa jaqyn tilde sóıleıtin jas muǵalim. Ol algebra jáne geometrııa pánderin jeńil ári tartymdy etip túsindirý úshin ázil men kúndelikti ómirden alynǵan mysaldardy sheber paıdalanady. Máselen, bir beınejazbasynda shóldegi qumnyń mólsherin qalaı esepteýge bolatynyn túsindiredi. Evgenııdiń oqytý ádisi kópshiliktiń qyzyǵýshylyǵyn týdyryp, matematıkaǵa degen kózqarasyn ózgertedi.
«TikTok»-taǵy taǵylymdy tartysta oza shapqan taǵy bir jeńimpaz – Marına Frangýlıdı. Ol – 37 jyldyq tájirıbesi bar pedagog. Pedagog platformada tek bilimin ǵana emes, sonymen qatar jeke oılaryn, avtorlyq ádistemelerin bólisip otyrady. Onyń kontenti – muǵalimniń jumysyna degen erekshe kózqarastyń kórinisi. Mysaly, bir beınejazbasynda oqýshylardyń ómirdegi jetistikterine qandaı faktorlar áser etetinin taldap, óz oılaryn ortaǵa salady. Marınanyń materıaly tek oqýshylarǵa ǵana emes, basqa muǵalimderge de jiger berip, qoldaý kórsetedi.
Bul baıqaý «TikTok»-ta taǵylymdy kontenttiń mańyzdylyǵyn kórsetip qana qoımaı, ustazdardyń shyǵarmashylyǵyn damytyp, oqytýdy jańa formatta usynýǵa jol ashty. Mundaı bastamalar bilim men tehnologııany úılestirip, jas urpaqtyń qyzyǵýshylyǵyn arttyrýǵa yqpal etetini sózsiz.
