Tatý kórshilik rýhyndaǵy seriktestik

Kezdesý barysynda qazaq-túrikmen ynty­maqtastyǵynyń keń aýqymdy máse­le­leri, onyń ishinde saıası, saýda-ekono­mı­ka­l­yq, tranzıt-kóliktik, energetıka jáne má­denı-gýmanıtarlyq salalar­daǵy óz­ara is-qımyl bolashaǵy talqylandy.

Taraptar dostyq, tatý kórshilik jáne ózara qurmet rýhyndaǵy strategııalyq seriktestikti odan ári nyǵaıtýǵa beıildi­ligin erekshe atap ótti.

Qazaqstan men Túrikmenstannyń syrt­qy saıası vedomstvolarynyń basshy­lary 2024 jylǵy qazanda Prezı­dent Qasym-Jomart Toqaevtyń Ashhabad­qa jasaǵan resmı saparynyń qorytyn­dysy boıynsha qol jetkizilgen ýaǵdalas­tyqtardyń is júzinde iske asyrylý barysyn jan-jaqty qaras­tyrdy. Parlamentaralyq jáne úkimet­aralyq baılanystardy nyǵaıtý baǵy­tynda odan ári járdemdesý boıynsha kelisti.

Saýda-ekonomıkalyq yn­ty­­m­aq­­tastyq­ty odan ári keńeıtý máse­lesi­ne erek­she nazar aýdaryldy. Keıin­gi eki jyl­da Qazaqstan men Túrikmen­stan arasyn­daǵy ózara saýda kólemi turaqty túrde 500 mln dollardan asyp keledi. Memleket basshylary belgilegen eki­jaqty taýar aınalymyn 1 mlrd dollarǵa deıin ulǵaıtý jónindegi maqsatqa jetý úshin kelisilgen sharalar qabyldaýǵa ýaǵdalasty.

Energetıka jáne kólik salalarynda aıtarlyqtaı áleýetke nazar aýdaryldy. Osy baǵyttardaǵy ózara tıimdi yntymaqtastyqty odan ári damytýǵa daıyndyq bildirildi.

Mádenı-gýmanıtarlyq yntymaq­tas­tyqtyń mazmundy kún tártibi erekshe atalyp ótti. Memleket basshylary­nyń tapsyrmasyna sáı­kes, byltyr Astana­da Maqtymquly eskertkishi­niń, Ashha­bad­ta Abaı men Qurmanǵazy eskert­kishteriniń saltanatty ashylý rásimderi ótti, sondaı-aq Qazaqstan men Túrikmenstannyń mádenıet kúnderi uıymdastyryldy.

Kezdesý barysynda mınıstrler óńirlik jáne halyqaralyq kún tártibiniń ózekti máse­leleri boıynsha «saǵattardy teńes­tirdi», kópjaqty qurylymdar sheń­berin­de tyǵyz yntymaqtastyqty jalǵas­ty­rýǵa, son­daı-aq eki memleket bastama­la­ryn ilgeri­letý barysynda ózara qoldaý kór­­setý­ge múddeliligin rastady. Osyǵan baı­la­nys­ty halyqaralyq uıymdar sheń­berin­de bir-biriniń kandıdatýralaryn qoldaý jónin­degi tıisti verbaldy notalarmen almasý ótti.

M.Nurtileý túrikmen tarapyn Birikken Ulttar Uıymy Bas Assambleıa­synyń sheshimimen Túrikmenstan­nyń usynysy boıynsha jarııalanǵan Halyqaralyq beıbitshilik pen senim jylynyń bastalýymen quttyqtady.

Syrtqy ister mınıstrleri Orta­lyq Azııa memleketteri basshylary­nyń konsýl­tatıvtik kezdesýleri jáne Halyq­aralyq Araldy qutqarý qory sheńberinde óńirlik yntymaqtastyqty damytý, sondaı-aq Ortalyq Azııada beıbitshilik pen turaqtylyqty nyǵaıtý boıynsha birlesken kúsh-jigerdiń mańyzdylyǵyn erekshe atap ótti.