Qazaqsha bilim alǵanymyzdy maqtan etemiz

Men Baıanaýyldyń Birlik aýy­lynda týyp-óstim. Otbasynda bes qyz bolsaq, bárimiz de aýyl­da kórshi qyzdarmen qazaqsha sóılesetinbiz. Ákem Nıkolaı Rýdolfovıch, anam Lıýdmıla Anatolevna da qazaqsha bir kisideı sóıleı alatyn. Qazaq mektebinde oqyp, bilim alǵanymyzdy maqtan etemiz. Oblys ortalyǵyndaǵy  Beısen Ahmetov atyndaǵy pedagogıkalyq kolledjde aýdarmashy-referent mamandyǵy boıynsha bilim aldym. Qazaq tilinen aǵylshyn tiline aýdarmashy, keıin Eýrazııa ınnovasııalyq ýnıversıtetinde qazaq tili men ádebıeti pánderiniń muǵalimi mamandyǵyn alyp shyqtym. Qazaq tilin bilgenimniń arqasynda ýnıversıtetke tústim, rektorlyq grant bólindi. Abaı, Muqaǵalı oqýlaryna qatysyp, júldeli oryndarǵa ıe boldym. Túrli qalalyq, respýblıkalyq  forýmdarǵa, dóńgelek ústelderge qatystym. Árıne, qazaq tilin jaqsy bilgenim úshin rejısserlerdiń jaqsy degen baǵasyn alyp, efır júrgizýge arnalǵan kastıngten óttim. Sol kezdegi oblys ákimi Baqytjan Saǵyntaevtyń qatysýymen bolǵan bir jıynda ol kisige qazaq tilinde  sóılegenim qatty unady ma, meniń oblystyq telearnaǵa kelýime úlken jol ashty. Árkez esime alyp, qýana rahmet aıtyp júremin. Biz –  qazaqstandyqtarmyz. Týǵan aýylym Birlik – meniń kishi Otanym, maǵan óte qymbat, sondyqtan eshteńege aıyrbastamaımyn,  dostarym da osynda. Aýylda biz qazaq bolyp óstik. Osy sebepti Qazaqstan – bizdiń máńgilik Otanymyz. Turmysqa shyqtym. Jubaıym Andreıdi bizdiń otbasymyzdaǵy jalǵyz orys dep kúlip qoıamyz. Ol da qazir azdap  qazaqsha túsinetin boldy. Sebebi, dostarynyń kóbi qazaq. Qyzymyz Arına kishkentaı, ol da  qazaqsha túsinedi, byldyrlap endi-endi sóıleı bastady. Biz óz elimizdegi tynyshtyq, birlik úshin Elbasyna rahmet aıtamyz, ózge ulttar degen  sózdiń ózin umyta bastaǵandaımyz. Bárimiz bir eldiń ul-qyzymyz degim keledi. Marına SAHAROVA, oblystyq «Qazaqstan-Pavlodar» telearnasynyń dıktor-telejúrgizýshisi. PAVLODAR.