Bul jóninde Mánshúk Mámetova memorıaldyq mýzeıiniń meńgerýshisi, ólketanýshy Ahmedııar Batyrhanov habarlady. Onyń aıtýynsha, jánibektik ardager týǵan jeriniń tarıhyna qumartyp, biraz jyldan beri kóne buıymdar, tarıhı jádigerler jınaýmen aınalysady eken. Bir táýiri, Tımýr Kárimuly tapqan buıymdaryn mýzeılerge tegin tapsyrady. Budan buryn da Jánibek aýdandyq mýzeıine, jergilikti mektep murajaılaryna da syılyq jasaǵan.
– Tımýr aǵamyz Jánibek aýdanynyń Qamysty aýlyna qarasty Hantúsken, Alǵabas, Jaıylma degen jerlerden túrli tarıhı jádiger kóp tabylatynyn aıtady. Bul qazirgi Reseıdiń Volgograd oblysy Pallasovka aýdanymen shekaralas aýmaq qoı. Bul jer Jáńgir hannyń jazǵy jaılaýyna baratyn joldyń boıy kórinedi. «Hantúsken» degen ataý sodan qoıylǵan. Tımýr Kárimuly óz kolleksııasynan 160 buıymdy Mánshúk mýzeıine tegin tartý etti, – deıdi Ahmedııar Qýanuly.
Bul jádigerler arasynda ertedegi sadaq jebesiniń ushtary, Altyn orda zamanyndaǵy jáne 1753–1976 jyldar aralyǵyndaǵy tıyndar, at ábzelderiniń bólshekteri, áıel áshekeıleri bar. Ekinshi dúnıejúzilik soǵys taqyrybyn zerttep júrgen Ahmedııar Batyrhanov jádigerler arasynan Vermaht armııasynyń emblemasy salynǵan qasyqtyń saby shyqqanyna qatty tańǵalǵan. Bolashaqta bul buıymdar mýzeı qoryna qosylyp, kórermen nazaryna usynylady.
Batys Qazaqstan oblysy
