Ádette qol qýsyryp qarap otyrýdy bilmeıtin qarııanyń densaýlyǵy syr berip, úıden shyqpaı jatyp alǵanyna da bir aıdyń júzi bolǵan. Qostanaı tóńireginde balalary aparmaǵan emhana, emshi qalmady. Dárigerler quddy bári kelisip alǵandaı, «alyp bara jatqan eshteńe joq, taza aýaǵa jıi shyǵaryp, tamaǵyn baptap berip, kóńilin aýlańyzdar» dep jymıyp shyǵaryp salady. О́tkende ortanshy uly Zańǵar taıaýda jumysynan suranyp Astanadaǵy myqty bir medısınalyq ortalyqqa aparatynyn aıtqanda qarııa maqul kórgen syńaı tanytqan edi. Endi, mine, sonyń bárin umytyp, aıaq astynan jolǵa shyǵamyn dep otyr.
Áýelde balalary jabylyp, kelinderi jalynyp júrip raıynan qaıtaryp kórmek bolǵan. Biraq qarııa «Týǵan jer túsime kirip júr, barmasam bolmas. Sóz shyǵyndap, bos áýre bolmańdar, shyraqtarym» dep short kesti. Ázeı ana da: «Ákeleriń jalǵyz ketip bara jatqan joq, baryp kelsin. Naǵashylaryńnyń kóligi jaıly, sharshatpaı aparyp keledi» degen.
Osy áńgimeden keıin bir aıdaı ýaqyt ótti. Sanaı qart aman-esen elge baryp keldi. Balalary bir-birine qarap jymyń-jymyń etedi. О́ıtpegende she, aqsaqal ótkendegideı emes, sergek, tipti jasaryp ketken tárizdi. Buryn bozaryp turatyn júzinde qan oınaı bastaǵan. Álgi naýqasynyń izi de joq. Amandyq suraı kelgen quda-jegjat, kórshi qolańnyń ortasynda baıaǵysha kósilip áńgime aıtyp otyr. Azdap tolysqan sııaqty ma, qalaı?
«Biz júregin shekaranyń tiken symyna tildirgen jaraly janbyz. Arǵy bette týǵan jer, bergi bette otanym – ekeýi de ystyq. Baıan-О́lgeıde jaman turǵan joqpyz. Ol jaqta da turmysymyz jaqsy, qadirli boldyq. Sonda da osy balalardyń bolashaǵy úshin dep, 38 jasymda aǵa-baýyrlarymnyń qasymyzda bol degenine qaramaı, jalǵyz kóship kettim. Odan jaman bolǵan joqpyz, Tobyl óńirine birjola ornyǵyp, jergilikti jurtpen bite qaınasyp, bir kisideı sińisip kettik. Uldy uıaǵa, qyzdy qııaǵa qondyrdyq. Áıtse de, tiri adam saǵynady eken. Kóktemniń ıisi sezile bastaǵannan-aq, jylqy tárizdi týǵan jerimdi ańsaı bastaımyn. Ondaıda denem aýyrlap, jatyp qalamyn. Balalar muny ákemiz syrqattanyp qaldy dep túsinip, dárigerden dárigerge aparyp, áýreleıdi. Saǵynyshtyń dertin qaıdan bilsin bular?», deıdi qarııa.
Sanaı Irkitbaıuly men Ázeı Bálelqyzy búginde Qostanaı qalasynyń irgesindegi Zarechnyı aýylynda turady. Ekeýi jeti bala ósirip, jeteýin jetkizip nemere-shóbere súıip, áýlettiń, eldiń tileýin tilep otyr. Balalary da ómirden óz ornyn tapqan, óńirge belgili azmattar. Tuńǵyshy Meırambek – kásipker. Aınury – mektep muǵalimi. Ortanshysy Zańǵar – belgili jýrnalıst, Halyqaralyq «Qazaq tili» qoǵamy óńirlik fılıalynyń tóraǵasy. Odan keıingi Dárkenbaıy – Elýbaı О́mirzaqov atyndaǵy Qostanaı oblystyq fılarmonııanyń janyndaǵy «Aqjeleń» folklorlyq-etnografııalyq ansambliniń beldi múshesi. Dárkenbaı qoly bos kezde kıiz úıdiń aǵashtaryn, úı jıhazdaryn jasaıdy. Altynbek – «Qostanaı-Sý» mekemesiniń mehanıgi. Tulpar jylqy sharýashylyǵymen aınalysady. Asyl tuqymdy sáıgúlik baptaıdy. Sút kenjesi Dúldúlbektiń de jeke sharýashylyǵy bar.
Bul áýlettiń kelinderi shetinen ismer. Qoldary qalt etse, Ázel anany aınala otyra qalyp ulttyq kıim úlgilerin tigip, qyz jasaýyn daıyndaıdy. Odan qaldy, Dárkenbaıdyń tapsyrysymen, kıiz úı jabdyǵyn tigedi.
Aıtpaqshy, álgi oqıǵadan keıin Sanaı qarııany balalary jyl saıyn Baıan-О́lgeıge aparyp turatyn bolǵan.
Qostanaı oblysy
