О́skemen órkendep keledi

Shyǵys óńiriniń ortalyǵy – О́skemende oń ózgerister kóp. Ásirese, qalany qaq jaryp aǵyp jatqan erke Ertistiń sol jaǵalaýy tez órkendep keledi. Jańadan boı kóterip kele jatqan bul bólikte turǵyn úıler, ákimshilik ǵımarattar, sporttyq-saýyqtyrý klasteri, teatr jáne saıabaqtar beldeýiniń qurylysy júrgizilip, birinen soń biri paıdalanýǵa berilýde. K.Marks dańǵylynyń qurylysy júzege asyryla bastady. Turǵyn úı-kommýnaldyq sharýashylyq salasynda aýqymdy jumystar atqarylýda. Aýmaqtardy kóriktendirý men sanıtarlyq tazalaýǵa kóp kóńil bólinýde. О́skemendi órkendetý jóninde qolǵa alynǵan ıgi jumystar jóninde shahar basshysy Temirbek Qasymjanov qala turǵyndarymen eseptik kezdesýinde baıandady. Qala ákimi sol jaǵalaýda ornalasqan Jibek matalar kombınaty, Kúlenov jáne Jylandy shaǵyn aýdandarynyń turǵyndarymen kezdesý barysynda Jibek joly, Bastaý, Bazovaıa, 5-jeltoqsan, Rıjskaıa, Zaısan, Entýzıast kósheleri asfalttalyp, Frýnze, Shors, Ýlıanov kóshelerine aǵymdaǵy jóndeý jumystary júrgizilgenin jetkizdi. Ákimniń aıtýynsha, sondaı-aq 11 kósheniń boıymen ortalyqtandyrylǵan sý qubyry tartylyp, K.Marks dańǵylyna jaryq shamdary, Á.Moldaǵulova kóshesine aıaldama kesheni ornatyldy. Eki kondomınıým aýmaǵynda 33 shaǵyn sáýlettik músinder paıda boldy. 18 qoqys alańy joıyldy. Barlyq kondomınýmderde ardagerler keńesi, jergilikti ózin-ózi basqarý komıtetteri, quqyq buzýshylyqtyń aldyn alý keńesteri quryldy. Turǵyndar kezdesýde kókeıkesti máselelerin jetkizdi. Onyń ishinde K.Marks dańǵylyndaǵy avtobýs baǵyttaryn uzartý, jabaıy janýarlardy aýlaý, Bolatov atyndaǵy emhananyń qyzmet kórsetý sapasyn jaqsartý jáne basqa da máseleler bar. Kezdesýge qatysqan salalyq qurylym basshylary atalǵan máselelerdiń sheshimin tabýǵa ýáde berdi. Jańa aýdannyń turǵyndary qalanyń tez ósip kele jatqany úshin shahar basshysynyń jumysyn oń baǵalap, qyzmetine tabys tiledi. Temirbek Qasymjanov sonymen birge, Oktıabr jáne Ablaketka shaǵyn aýdandarynyń turǵyndarymen kezdesti. Turǵyn úı-kommýnaldyq sharýashylyǵyn jańǵyrtý baǵdarlamasy boıynsha jemisti jumystar júrgizilgen shaǵyn aýdandarda bıyl «jasyl beldeý» jobasy qolǵa alynyp, Gagarın býlvarynda demalys múıisi, balalardyń oıyn alańy salynbaq. Sondaı-aq, qala menshigine ótken Metallýrgter saıabaǵy jańa kestege saı qysy-jazy qyzmet kórsetetin bolady. Dýman ANASh, «Egemen Qazaqstan». О́SKEMEN.