Foto: Ǵ.Músirepov atyndaǵy Qazaq memlekettik akademııalyq balalar men jasóspirimder teatry
Qazaq ádebıetiniń dara tulǵasy, halyq jazýshysy Á.Nurshaıyqovtyń qarymdy qalamynan týǵan «Mahabbat, qyzyq, mol jyldar» romany qazaq ádebıetiniń eń qundy injý-marjandarynyń biri. Soǵystan óz eline saǵyna oralǵan Erboldyń oqýǵa túsip, 33-aýdıtorııada ózin gúlge tolǵan baqta otyrǵandaı sezinýi, ómirlik dostar jáne eń bastysy, máńgilik mahabbatyn tabýy baıandalatyn mahabbat dastany oqyrmannyń ystyq yqylasyna bólengeni haq.
Máselen, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń repertýaryndaǵy «MAHABBAT QYZYQ MOL JYLDAR» (rej.: F.Moldaǵalı) qoıylymy qysqa ǵana ýaqyt aralyǵynda kórermenniń kózaıymyna aınalyp úlgergen. Erekshe estetıka men jaǵymdy atmosferaǵa toly spektaklge suranys kún saıyn artyp, ystyq yqylasqa bólenýi kóńilge kórkem qýanysh uıalatqany sózsiz. Kórermen qaýymnyń suranysynyń sheksiz ekenine alys-jaqyn qalalar men shaǵyn aýyldarda turatyndaryna qaramastan, spektakldi kórýge degen qulshynystarynyń bıik bolýy dálel.
«Uly ónerdi qurmettegen, aıaýly kórermenniń ystyq yqylasyn eskergen teatr qazaq teatrlary arasynda alǵashqy bolyp arnaıy ózge eldi mekender men qalalar úshin «Sezim sapary» atty spektal-týr bastady. Sezimge toly sapar qurmetti kórermenniń suranysymen elimizdiń onnan asa qalalaryn aralap, ár kórsetilimdi anshlagpen ótkizip úlgerdi. Kórermenderge kórkem qoıylym tartý etip ǵana qoımaı, artıstermen kezdesý uıymdastyryp, eń belsendi kórermenderge teatrdan estelik retinde túrli syılyqtar jasaldy. Sezimge toly sátti sezinýge asyq ónersúıer qaýymnyń qarasy munymen shektelmeıtini málim. Osy suranysty eskergen Músirepov teatry kezekti qalalarǵa sapar shekpek», delingen habarlamada.
«Sezim sapary» spektakl-týry kezekti aıaldamalary:
- Sáýirdiń 15-i saǵat 19:00-de kıeli Túrkistan qalasyndaǵy Túrkistan mýzykalyq drama teatry;
- 18-sáýir saǵat 19:00-de Shymkent qalasyndaǵy J.Shanın atyndaǵy Shymkent qalalyq akademııalyq qazaq drama teatrynda;
- 20-sáýir saǵat 19:00 de tarıhı Taraz qalasyndaǵy A.Toqpanov atyndaǵy Jambyl oblystyq qazaq drama teatrynda mahabbat dastanyn shyrqaý úshin qurmetti kórermenin kútedi.
Bıletter atalǵan teatrlardyń tıketon saıtynda qoljetimdi.
