Mýzeı dırektory Muhambetqalı Kıpıevtiń aıtýynsha, arheologııalyq zertteý nátıjesinde Ulyq ulys (Altyn Orda) kezeńine tán kóp jádiger tabylǵan. Onyń ishinde soǵý ádisimen jasalǵan, arabsha jazýmen, ósimdik sýretimen bezendirilgen kúmis, qola tıyndar, kóptegen qysh ydys, áshekeıler, janýarlardyń súıekteri men metall buıymdar bar.
«Erekshe nazar aýdarýǵa turatyn jádigerdiń biri – Altyn Orda kezeńine tıesili altyn japsyrma. Mundaı jádiger alǵash ret tabyldy. Osy kezge deıin ortaǵasyrlyq Saraıshyq qalashyǵyna birneshe ret arheologııalyq zertteý jumysy júrgizildi. Biraq altyn buıym tabylmaǵan bolatyn», deıdi M.Kıpıev.
Onyń pikirinshe, altyn japsyrma qobdıshanyń nemese kishkentaı sandyq qaqpaǵynyń topsasy retinde qoldanylǵan bolýy múmkin. Bul buıym órnekteý tásili arqyly jasalǵan. Joǵary bóliginiń aınalasyna ırelengen órnek salynypty. Joǵary jáne tómengi bóligi qoshqar múıiz oıýymen órnektelgen. Topsa retinde bekitýge arnalǵan eki tesigi bar.
Altyn japsyrmanyń ólshemi tym úlken emes. Onyń uzyndyǵy – 6 sm, eni – 1 sm. Al qalyńdyǵy 0,2 sm-di quraıdy.
Mýzeı qyzmetkerleri Ulyq ulys kezeńindegi altyn japsyrmaǵa restavrasııa júrgizipti. Sodan ony «Saraıshyq» memlekettik tarıhı-mádenı mýzeı-qoryǵyna tapsyrdy. Osy kezge deıin tarıhı qalashyqtaǵy mýzeı-qoryǵy 286 jádigermen tolyǵypty.
Atyraý oblysy
