Kelýshiler VR kózildirik arqyly 1930 jyldardaǵy Bulaq aýylyndaǵy Álııanyń áke-sheshesi Nurmuhamed Sarqululy pen Marjan Moldaǵulqyzynyń úıin kóre alady. Munda HH ǵasyr basyndaǵy aýyldyń qam kirpishten soǵylǵan úılerin, sharýashylyq zattaryn, adamdarynyń turmysyn, tutynǵan dúnıelerin kórýge bolady. Ekskýrsııa júrgizýshisiniń ornyna qoıylǵan promýter kelýshilerge bes tilde aqparat beredi. Sondaı-aq mýzeı tórinde Álııanyń jaýyngerlik kıimderi, maıdannan jazylǵan hattary, áskerı bıleti, Lenıngradtaǵy balalar úıiniń, mergender mektebiniń tarıhı fotolary, batyr týraly ár jyldary jaryqqa shyqqan kitaptar men túsirilgen fılmder qoıylǵan.
1987 jyly salynǵan Álııa Moldaǵulovanyń memorıaldy mýzeıinde 11 myńnan astam eksponat bar. Mekeme dırektory Janar Maqsutovanyń aıtýynsha, qor jazǵa deıin taǵy da jańa derektermen tolyǵady. Bıyl Keńester Odaǵynyń Batyry Álııa Moldaǵulovanyń týǵanyna 100 jyl. Ol 1925 jyldyń maýsymynda Qobda aýdany Bulaq aýylynda dúnıege kelip, 1944 jyldyń 14 qańtarynda Pskov oblysy Novosokolnıkı aýdanynda erlikpen qaza tapty.
