Áńgimelesý barysynda Májilis spıkeri Han Chýnlındi Qazaqstandaǵy dıplomatııalyq mıssııasynyń bastalýymen quttyqtap, bul ekijaqty qarym-qatynastyń qarqyndy damýy kezeńine sáıkes kelgenin atap ótti.
– Qytaı – bizdiń eń jaqyn kórshimiz. Ekijaqty qarym-qatynasymyz jańa «altyn otyz jyldyqtyń» kezeńine enip, máńgilik jan-jaqty strategııalyq áriptestik rýhynda nyǵaıyp keledi. Bul – eń aldymen, elderimizdiń kóshbasshylarynyń qajyrly eńbeginiń nátıjesi. Prezıdent Qasym-Jomart Toqaevpen Tóraǵa Sı Szınpınniń turaqty jeke kezdesýleri Qazaqstan-Qytaı yntymaqtastyǵyn jańa deńgeıge shyǵardy, – dedi E.Qoshanov.
Májilis spıkeri memleket basshylary qol jetkizgen barlyq ýaǵdalastyqty iske asyrý úshin parlamentaralyq baılanystardy damytýǵa daıyn ekenin aıtty.
Erlan Qoshanov sondaı-aq dıplomatty Memleket basshysynyń jetekshiligimen Qazaqstanda júzege asyrylyp jatqan aýqymdy ekonomıkalyq jáne saıası reformalar týraly habardar etti. Máselen, halyqtyń beıbit atomdy senimdi ári ekologııalyq taza energııa kózi retinde damytý týraly sheshimi jaıly aıtyp, bul qadam aldaǵy ýaqytta ǵylymnyń, tehnıkanyń jáne óndiristiń órkendeýine bastaıtynyna nazar aýdardy. Sondaı-aq óndiris salasyn keńeıtý, bank sektoryn nyǵaıtý jáne ınvestısııa tartý boıynsha josparlar da sóz boldy.
О́z kezeginde Han Chýnlın Qazaqstan men Qytaı kóshbasshylary saıasatynyń ortaq tustary baryn jáne halyqaralyq kún tártibinen ekonomıkalyq damýǵa deıingi máseleler boıynsha uqsas qundylyqtardy qamtıtynyn atap ótti. Elshi Qazaqstan QHR úshin Ortalyq Azııadaǵy asa mańyzdy saýda jáne ınvestısııalyq áriptes ekenine toqtaldy. Ol sondaı-aq partııaaralyq baılanysty nyǵaıtýǵa mán berdi.
Taraptar energetıka, jasandy ıntellekt, sıfrlyq ekonomıka, bilim berý jáne týrızm sııaqty baǵyttardaǵy yntymaqtastyqty tereńdetý jaıyn da talqylady.
