Foto: Mádenıet jáne aqparat mınıstrligi
Saýyq Jaqanova óziniń kóp jyldyq el mádenıetine sińirgen eńbegi úshin «Qurmet» ordenimen marapattaldy.
Is-sharaǵa memleket jáne qoǵam qaıratkerleri, shyǵarmashylyq zııaly qaýym ókilderi, radıo jáne televızııa qyzmetkerleri, jýrnalıster, dıktordyń týystary men jaqyndary qatysty.
Jıynda Qazaqstannyń mádenıet jáne aqparat mınıstri Aıda Balaevanyń quttyqtaý haty oqyldy.
«Sizdiń elimiz úshin sińirgen eńbegińiz qazaq halqynyń tarıhynda altyn áriptermen jazyldy. Radıo, bilim salasyna qosqan úlesińiz orasan zor. Qazaq radıosynyń sandýǵashy atanyp, jarty ǵasyrǵa jýyq efırde úzdiksiz qyzmet etip, tyńdarmandardyń júregine jol taptyńyz. Dıktorlyq sheberligińiz, efırdegi erekshe únińizben qatar, ónegeli ómir jolyńyz urpaqqa úlgi. Jurtshylyq Sizdi óz isiniń maıtalmany ǵana emes, kóptegen shákirt tárbıelegen ulaǵatty ustaz retinde de erekshe qurmet tutady», delingen hatta.
«Sahara sandýǵashy» kitabynda Saýyq Jaqanovanyń ómir joly, radıo men teledıvızııadaǵy shyǵarmashylyǵy, sondaı-aq oqytýshylyq qyzmeti týraly baıandalady.
