Baıraqty básekeni Taılandtyń Bangkok qalasy ótkizip jatyr. Oǵan 23 memleketten 320-ǵa jýyq sportshy qatysty.
El namysyn qorǵaýǵa attanǵan nysana kózdeý sheberleri arasynan Konstantın Malınovskıı, Oleg Noskov, Kırıll Sýkanov jáne Elızaveta Bezrýkovalar eń úzdik nátıje tirkep, óz baǵyttarynda chempıon atandy.
Buǵan qosa, qazaqstandyq qyz-jigitter komandalyq syndarda da sátti óner kórsetti. Naqtyraq aıtqanda, erler arasynda pnevmatıkalyq vıntovkamen 10 metrdegi nysanany kózdeýde jerlestirmiz jeńiske jetti. Artynsha tapanshamen 10 metrdegi nysanany kózdeýdiń komandalyq synynda da Qazaqstannyń jasóspirimder komandasy top jardy.
Jalpy alǵanda qorjynymyzda qazir 5 altyn, 6 kúmis, jáne 3 qola medal bar. Sonyń arqasynda jalpykomandalyq esepte ázirge 1-shi orynda turmyz jáne jarys sońyna deıin osy deńgeıdi saqtap qalarymyzǵa senim bar. Bangkok qalasyndaǵy qurlyqtyq doda 22 aqpanǵa deıin jalǵasady.
