Foto: primeminister.kz
Ulttyq statıstıka bıýrosynyń málimetinshe, bıyl qańtar aıynda azyq-túlikke jatpaıtyn taýarlardyń jyldyq ósimi 8,4%-ǵa, al qyzmet kórsetý baǵasy 13,8%-ǵa kóterilgen.
Sondaı-aq sıyr eti (1,2%) men kúnbaǵys maıynyń (1,1%) baǵasy ósken. Eń joǵary ósimi Ulytaý (4,8%), Aqtóbe (3,8%) jáne Shyǵys Qazaqstan (2,7%) oblystarynda tirkelgen.
Baǵany retteý maqsatynda aımaqtardaǵy turaqtandyrý qorlarynan ónimderdi saýdaǵa shyǵarý jalǵastyp jatyr. Aýyl sharýashylyǵy vıse-mınıstri Erbol Tasjúrekovtiń aıtýynsha, 156,9 myń tonna qordan tek 45,4 myń tonna kókónis satylǵan. Keıbir oblystarda kókónisti satý qarqyny belgilengen kólemnen tómen, bul baǵanyń ósýine sebep bolyp otyr. Máselen, Abaı oblysynda 2,8 myń tonna kartoptyń tek 486 tonnasy ǵana satylyp, nátıjesinde baǵa 24,2%-ǵa qymbattaǵan. Keıbir óńirlerde sábiz, qyryqqabat jáne pııaz baǵasyna qatysty osyndaı jaǵdaı baıqalady.
Sondaı-aq ol ákimdikterdiń málimetinshe, qańtardyń sońynda qosalqy sharýashylyqtardaǵy qordy esepke almaǵanda, kartop qory 327 myń tonnany quraǵanyn aıtty. Al, 23 qańtar men 14 aqpan aralyǵynda halyqtyń tutyný kórsetkishi 73,5 myń tonna kóleminde boldy.
«Jeke qosalqy sharýashylyqty eseptemegende, 253,5 myń tonna kartop qory 2025 jyldyń erte pisetin ónimin alǵanǵa deıin halyqtyń ishki qajettiligin tolyq jabýǵa múmkindik beredi», dedi Erbol Tasjúrekov.
Serik Jumanǵarın keńeske qatysýshylardyń nazaryn azyq-túlik baǵasyn turaqtandyrýǵa baǵyttalǵan sharalardy jedeldetý qajettigine aýdardy. Negizgi maqsat turaqtandyrý qorlarynan ónimderdi jedel shyǵarý jáne óńirler men megapolısterde apta saıynǵy jármeńkelerdi ótkizý.
«Baǵanyń aýytqýy men satýdaǵy qandaı bolmasyn shekteýlerdi boldyrmaý úshin turaqtandyrý pýnktterindegi ónim baǵasyndaǵy aıyrmashylyqty joıý qajet. Sondaı-aq kommýnaldyq bazarlar men saýda jelilerimen tyǵyz jumys isteý kerek. Aqpan-naýryz aılarynda turaqtandyrý qorlaryndaǵy ónimderdi satý jáne sáýir aıynda jańa kókónisterdi jetkizýdi qamtamasyz etý qajet. Bul aýyl sharýashylyǵy mınıstrligi men saýda jáne ıntegrasııa mınıstrliginiń maýsymaralyq kezeńde áleýmettik azyq-túlik baǵasynyń turaqtylyǵyn saqtaý úshin óńirlermen birlesip sheshetin basty mindetteri», dedi Serik Jumanǵarın.
