Á.Qasteev mýzeıinde uıymdastyrylǵan «Qara jer» atty jeke kórme O.Qabóke shyǵarmashylyǵynan keń oryn alatyn jady men ótkendi qaıta qaraýdyń erekshe alańy ispetti. Kórmeniń ıdeıasy onyń jeke estelikterinen bastaý alǵanymen, shalqar shabyt ony tar menshiktiń sheńberinen alyp shyǵyp, keń aýqymdy tarıhı jáne áleýmettik máselelerdi tolǵaýǵa týra baǵyttaǵan. Qylqalam sheberi óziniń jumystary arqyly estelikterdiń qalaı saqtalatynyn, ony qaıta qaraýdyń kúrdeliligin, urpaqtan-urpaqqa qalaı beriletinin baıandaıdy.
«Kórmedegi kóńil aýdaratyn mańyzdy týyndy «Ákemniń beınesi» dep atalady. Saǵynysh pen muńǵa toly bul shyǵarma ekspozısııanyń keńistiginen aýqymdy oryn alady. Iаǵnı portret qurbandyqqa arnalǵan qoıdyń basy beınesimen, topyraq úıindilerinen quralǵan qabir ınstallıasııasymen jáne avtordyń performansymen jalǵasyn tabady. Osy kezeńde jazylǵan shyǵarmalar ótkir qara jıekpen kómkerilgenimen erekshe. Sýretshi shyǵarmashylyq jolynda realızm, natýralızm, kýbızm, sıýrrealızm, sımvolızm, metamodernızm syndy túrli baǵyttardy ózinshe zerttep, birshama izdenister jasaıdy. Nátıjesinde, onyń monýmentaldy kenepterinde sary, qyzyl, sur, kók tústerdiń aıasynda ornalasqan, denelerdiń pishinin syndyra ótetin qara jıekter legi paıda bolǵan. Ol kenep ústinde fılosofııalyq kózqarasy men azamattyq ustanymyn jasyrmaı jaıyp salady. «Aq» atty aq-qara jáne sary reńkterdiń úılesiminde jazylǵan týyndysynda adamnyń jaryq dúnıege kelgeninen bastap baqıǵa deıingi kezeńderin jalpylaı qarastyrady» deıdi sýretshi shyǵarmashylyǵynyń qyr-syrymen tanystyrǵan kórme jetekshisi, ónertanýshy Sandýǵash Myrzabekova.
Oralbek «Aıan» atty keskindemesin grafıkalyq mánerde jazyp, kompozısııa mazmunyn surǵylt-kógildir reńdermen ashady. Bul – avtordyń túsinde kórgen bulyńǵyr oqıǵasynyń úzindisi. Býaldyr saǵym ishindegi oqıǵany eki adamnyń kúrdeli rakýrsymen sheshedi. Sýretshi ózine kelgen jaısyz aıandardan keıin, shynaıy ómirde basynan keshken qaterli jaǵdaılardy ishteı esine saqtap qalǵan sáttegi sezimin baıandaıdy. Al «Tar bólme» atty kompozısııasynda sýretshi ózine tán tehnıkany qoldanady – keneptiń jazyqtyǵyn tar bólmeniń keńistigine aınaldyryp, bir otbasynyń múshelerin órnektep jaıǵastyrady.
ALMATY
