«Romeo men Jýletta» spektakli – ózektiligin joımaǵan máńgilik klassıka. Talaı márte sahnalanǵan bul shyǵarmanyń árbir jańa qoıylymy ózindik kúsh-qýatymen, shyǵarmashylyq tyń oı-tolǵanysymen erekshelenedi. Ár qoıylǵan saıyn tosyn forma, erekshe saraptaýda sahnaǵa jol tartatyn Veronanyń qos ǵashyǵy týraly máńgilik taqyryp «Astana Balet» teatry sahnasynda bul joly da jańashyl lepte ún qatty. Túrli býyn kórermenniń qyzyǵýshylyǵyn bir sát te kemitpegen aıtýly klassıkadan árkim óz zamandastarynyń kelbetin tanyǵany sózsiz.
Baletmeıster úsh aktili baletti eki aktige qysqartyp, sonyń nátıjesinde qoıylym dınamıkasyn arttyrǵan. Jalpy, baletti jiti baqylap júrgen kórermen Vladımır Iаkovlevtiń horeografııa tiliniń ózindik qoltańbasyn birden tanyry sózsiz. Sýretker eńbeginde romantıkalyq sahnalarǵa ǵana emes, tragedııa astaryna da basa mán berilip, jaýlasqan eki otbasynyń arasyndaǵy qaqtyǵys jan-jaqty ári shynaıy kórsetiledi. Sondaı-aq spektakldegi jekpe-jek pen dýel sahnalary da búge-shigesine deıin oılastyrylyp, sonyń arqasynda shyǵarmanyń dınamıkasy artyp, kórermen taqymyn qysyp otyrarlyqtaı erekshe emosııany bastan keshkeni anyq. Atap aıtsaq, Romeo men Jýlettanyń arasyndaǵy móldir sezim, Merkýsıonyń ázilkeshtigi, Kútýshiniń qarapaıymdylyǵy, Lorensonyń danalyǵy, Tıbaldtiń qatygezdigi, ıtalııalyq kóshelerge tán naqyshtar men merekelik kóńil, ajal sahnasyndaǵy dramatızm – osynyń bári spektaklde sátti kórinis tapqan. Al pantomıma elementteri Veronanyń jaýlasyp júrgen eki otbasy ókilderiniń shaıqasatyn sahnalarynda molynan qoldanylǵan.
Balettegi mýzykalyq bezendirilý – ol da óz aldyna bólek áńgime. Bas dırıjer Arman Orazǵalıev jetekshilik etetin orkestr oryndaýyndaǵy ǵajaıyp mýzyka sol sátte-aq teatrdyń turaqty kórermenderiniń súıikti áýenine aınalyp úlgerdi. S.Prokofevtiń áýenin orkestr túrli emosııa men názik sezim yrǵaǵyna kómkerip, tamasha týyndyny kórermen júregine jetkize aldy. Sebebi sezimtal mýzykant qos keıipkerdiń arasyndaǵy mahabbat pen shıelenisti mýzyka tilinde meılinshe shynaıy ári áserli asha bilgen. Al shaǵyn ári jıi almasyp otyratyn ssenografııa, ásem kostıýmder halyq ómiri hám veronalyq aqsúıekterdiń tynys-tirshiligi men Lorenso shirkeýiniń kórkem bezendirilýi, sonymen qatar Kapýlettı áýletiniń otbasylyq mazary kórermen qaýymdy bir sátke Qaıta órleý dáýirine jetelep áketkendeı ǵalamat sezimge bóledi. Sonyń arqasynda balet te ózindik kórkemdik bıikke kóterilgendeı áser syılady.
Qoıylymda negizi basty partııalardy teatrdyń talantty akterleri oryndady. Atap aıtsaq, Romeony Súndet Sultanov pen Ýeslı Karvalo, Jýlettany Nazerke Aımuhametova men Natalııa Fernandes Menes, Tıbaldty Farhad Býrıev pen Baýyrjan Boranbaev, Merkýsıony Erqanat Ermaǵambet, Benvolıony Nurzat Berikqazyuly, Parısti Ýeslı Karvalo men Súndet Sultanov, Lord Kapýlettıdi Ildar Shakırzıanov, Ledı Kapýlettıdi Ásel Janǵasqaeva men Rıza Qanatqyzy, Kútýshini Shyryn Zaıchıkova kemeline keltire keıiptedi. Bekzat ónerden rýhanı lázzat alyp, sahnadaǵy sulýlyqqa jan sýarǵan talǵampaz kórermen teatrdan rıza bolyp tarqasty.
