Eýrazııa ulttyq ýnıversıteti – atalǵan erikti jınaqtaý júıesiniń bastamasyn qoldaǵan elimizdegi alǵashqy joǵary oqý oryndarynyń biri. Memleket basshysynyń 2023 jyly «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda aıtylǵan tapsyrmasyn iske asyrý maqsatynda ázirlengen jańa júıe balalaryna sapaly bilim alýdy josparlaıtyn otbasylarǵa aıtarlyqtaı múmkindik beredi.
Aıtalyq, osyǵan sáıkes bala 5 jasqa tolǵan kezde memleket bastapqy bilim berý kapıtalyn 60 AEK (2025 jyly bul 235 920 teńge) kóleminde, al jetim balalar úshin 120 AEK (471 840 teńge) kóleminde bastapqy bilim berý kapıtalyn bóledi. Sondaı-aq jyl saıyn 5-7 paıyz mólsherinde memlekettik syılyqaqy jáne qatysýshyǵa banktiń syıaqysy nemese ómirdi saqtandyrý kompanııasynan ınvestısııalyq syıaqy tólenedi.
Sonymen qatar «Keleshek» júıesine qatysýshylarǵa birqatar jeńildik qarastyrylǵan. Máselen, jetim balalarǵa nemese ata-anasynyń qamqorlyǵynsyz qalǵandarǵa oqý aqysyna 50 paıyz jeńildik berilse, múmkindigi shekteýli jandarǵa 30 paıyzǵa deıin jeńildik jasalǵan. Al kópbalaly otbasylarǵa 30 paıyzǵa deıin jeńildik bolsa, az qamtylǵan otbasylarǵa 20 paıyzǵa jeńildik qarastyrylǵan. Sondaı-aq basqa da sanat ókilderi stýdentter úıinde (jataqhanada) oqýdyń barlyq kezeńinde tegin turady.
L.N.Gýmılev atyndaǵy Eýrazııa ulttyq ýnıversıteti oqý kezinde (9-11 synyptar) ǵylymı-zertteý qyzmetimen aınalysatyn talapkerlerge aıryqsha nazar aýdarmaq. Olarǵa 70 paıyzǵa deıin jeńildik beriledi. Bul qoldaý ǵylym men bilimniń damýyna óz úlesin qosyp júrgenderge jańa múmkindik ashady. Jastardy ǵylymǵa yntalandyryp, bilimge qushtarlyqtaryn oıatady.
Seriktestik aıasynda qos tarap qarjylyq qoljetimdilikti arttyrýǵa, daryndy stýdentterdi qoldaýǵa, ınnovasııalyq bilim berý jobalaryn júzege asyrýǵa baǵyttalǵan yntymaqtastyqty nyǵaıtýdy josparlap otyr.
Dıdar ASYLHANOV,
Q.A.Iаsaýı atyndaǵy Halyqaralyq qazaq-túrik ýnıversıtetiniń 3-kýrs stýdenti
