Kollajdy jasaǵan – Záýresh Smaǵul, «EQ»
Oqys oqıǵa aımaǵynda «Seriktes AQQ» JShS-nyń qutqarý bólimsheleri apattyq-qutqarý jumystaryn júrgizdi. Ulytaý, Qaraǵandy oblystarynyń tótenshe jaǵdaılar departamenti kúshteri men quraldary jumyldy. Onyń ishinde kınologııalyq toptar, Tótenshe jaǵdaılar mınıstrligi apattar medısınasy ortalyǵynyń medısına qyzmetkerleri men psıhologteri barynsha jedel jetti. Tótenshe jaǵdaılar mınıstrligi Komandalyq ortalyǵynda, Ulytaý oblysynyń TJD bazasynda jedel shtabtar jumys istep jatyr. Tótenshe jaǵdaılar mınıstrliginiń Komandalyq ortalyǵynda beınekonferensııa baılanysy arqyly apattyq-qutqarý jumystary jónindegi jedel shtabtardyń is-qımyldary úılestirildi. Tótenshe jaǵdaılardyń aldyn alý komıtetiniń tóraǵasy Serik Júnisbekov, Ulytaý oblysy TJD bastyǵy Esen Baıyrov, ónerkásiptik qaýipsizdik komıteti tóraǵasynyń orynbasary Keńgirbaı Eseneevtar da oqıǵa ornyna jetti. Amal ne, úıindi astynan 7 kenshiniń de máıiti shyǵaryldy.
Prezıdent Qasym-Jomart Toqaev «Qazaqmys» korporasııasynyń Ulytaý oblysyndaǵy kenishinde tas-topyraq qyrtysynyń opyrylýy saldarynan qaza bolǵan jumysshylardyń otbasy men týǵan-týystaryna kóńil aıtý jedelhatyn joldady. Memleket basshysy Úkimetke tótenshe jaǵdaıdyń mán-jaıyn muqııat tekserý jóninde mindet júktedi. Salalyq vedomstvolar men óńir ákimdigine marqumdardyń otbasylaryna barlyq qajetti kómek kórsetý týraly tapsyrma berdi.
Premer-mınıstr Oljas Bektenovtiń tapsyrmasymen Ulytaý oblysy Jańaarqa aýdanyndaǵy shahtanyń opyrylýy sebepterin anyqtaý, zardap shekkenderge kómek kórsetý jónindegi arnaıy komıssııa quryldy. Komıssııany Premer-mınıstrdiń orynbasary Qanat Bozymbaev basqarady. Oqıǵa ornynda TJ qyzmeti, IIM, О́nerkásiptik qaýipsizdik komıtetiniń shuǵyl tergeý tobymen qatar Eńbek jáne halyqty áleýmettik qorǵaý mınıstrligi, О́nerkásip jáne qurylys mınıstrliginiń qyzmetkerleri jumys istep jatyr. Komıssııa músheleri oqıǵa ornynda bolyp, tergeý barysymen tanysty. Qaza tapqandardyń otbasylaryna birinshi kezekte kómek kórsetý jóninde tapsyrma berildi. Osydan soń Premer-mınıstrdiń orynbasary Shtab otyrysyn ótkizip, qaza tapqandardyń týystarymen kezdesti.
Tótenshe jaǵdaılar mınıstrligi baspasóz qyzmetiniń habarlaýynsha, qaıtys bolǵan 7 adamnyń denesi sot-medısınalyq saraptama júrgizý úshin polısııa qyzmetkerlerine tapsyryldy. Qaza tapqan kenshiler:
1) Aqshalov Qaırat Amanbekuly, 1975 jyly týǵan, sorǵy qondyrǵylarynyń mashınısi.
2) Jaqubaev Ardaq Boranbaıuly, 1998 jyly týǵan, jerasty ýchaskesiniń taý-ken sheberi.
3) Jumadollaev Baqytbek Nyshanuly, 1975 jyly týǵan, sorǵy qondyrǵylarynyń mashınısi.
4) Kenjebekov Orynbek Ámirhanuly, 1991 jyly týǵan, tıeý-jetkizý mashınasynyń mashınısi.
5) Moldabekov Ǵalymjan Esenbekuly, 1978 jyly týǵan, sorǵy qondyrǵylarynyń mashınısi.
6) Nuroldaev Oljas Jaǵalbaıuly, 1979 jyly týǵan, jerasty ýchaskesiniń energetıgi.
7) Rojkov Konstantın Vladımırovıch, 1992 jyly týǵan, jerasty taý-ken qazý jabdyqtarynyń elektr slesari.
Ulytaý oblysynyń ákimdigi ken ornynda qaza tapqan jumysshylardyń otbasylary men jaqyndaryna psıhologııalyq jáne áleýmettik turǵydan qajetti qoldaýdyń barlyǵy kórsetiletinin habarlady. Qaıǵyly oqıǵaǵa baılanysty óńir basshysy D.Ryspekov: «Qaıǵyly oqıǵa barshamyzdyń júregimizge aýyr tıdi. Bul jaǵdaı – otbasy úshin orny tolmaıtyn qaza. Qaıtys bolǵan kenshilerdiń týǵan-týystaryna, jaqyndaryna shyn júrekten kóńil aıtamyn. Qaza tapqandardyń otbasylaryna qajetti kómek kórsetý úshin barlyq tıisti shara qabyldanady», dep málimdedi.
«Qazaqmys korporasııasy» seriktestigi ujymdyq kelisimshartta kózdelgendeı, kenishte qaza tapqandardyń otbasylaryna barlyq qajetti kómek kórsetiletinin habarlady. Áleýmettik, materıaldyq qoldaý, sonyń ishinde moraldyq zııandy óteý maqsatynda qaza tapqandardyń otbasylaryna jumyskerdiń ortasha jyldyq jalaqysynyń 10 eselengen mólsheri beriledi. 2 mln teńgeden astam soma jerleý rásimderin uıymdastyrýǵa tólenedi. Osyǵan qosa, asyraýshysynan aıyrylý jaǵdaıyna baılanysty aı saıynǵy tólemder, balalardyń oqý aqysyn tóleý, qaza tapqan jumysshylardyń nesıe qaryzdaryn jabý, sondaı-aq otbasy músheleriniń ótinishi boıynsha basqa da kómek túrleri qarastyrylady.
Apattyń naqty sebep-saldary aldaǵy kúnderi anyqtalady. Qalaı degende de keıingi jyldary eldegi iri óndiristik kompanııalarda adam ólimine alyp kelgen oqys, qaıǵyly oqıǵalardyń jıi tirkelip ketkeni qatty alańdatady. Bul taý-ken salasyndaǵy jumysshylardyń qaýipsizdigi máselesi áli de bolsa oń sheshimin tappaı kele jatqanyn bildiredi. Qaıǵyly oqıǵaǵa qatysty Qylmystyq kodekstiń 277-babynyń 3-bóligi, «Taý-ken nemese qurylys jumystaryn júrgizý kezinde qaýipsizdik erejelerin buzý» faktisi boıynsha is qozǵaldy. Oqıǵa ornynda Ulytaý oblysynyń polısııa departamentiniń jedel-tergeý toptary jumys istep jatyr.
