ASTANA. 7 aqpan. Kremlde túnde Reseı, Germanııa jáne Fransııa basshylary Vladımır Pýtın. Angela Merkel jáne Fransýa Olland arasyndaǵy bes saǵatqa sozylǵan kelissóz máresine jetti. Bul týraly «Kommersant» habarlady.
«Jumadan senbige qaraǵan túne Máskeýde RF, GFR jáne Fransııa basshylary Vladımır Pýtınniń, Angela Merkeldiń jáne Fransýa Ollandtyń qatysýymen ótken úshjaqty kelissóz aıaqtaldy. Úsh eldiń lıderleri Mınsk kelisiminiń oryndalýyna qol jetkizý, sondaı-aq bul kezdesýdiń qorytyndylaryn jeksenbide telefon arqyly «normand formatynda» júrgiziletin áńgimede shyǵarý týraly kelisti», - dep jazady basylym osy oraıda.
Máskeýde túnniń jarymy aýa aıaqtalǵan kelissózdiń aldyn ala qorytyndylary týraly birinshi bolyp RF prezıdentiniń baspasóz hatshysy Dmıtrıı Peskov aıtyp berdi. Ol kelissózdiń sıpatyn «júıeli, mazmundy jáne sheshimdi» dep atap kórsetti. Onyń nemis jáne fransýz áriptesteri de osyndaı pikirde boldy.
«Qazirgi tańda Mınsk kelisimin jetildire túsý boıynsha yqtımal birlesken qujat mátinin daıyndaý úshin birlesken jumystar júrgizilýde. Ol Ýkraına prezıdentiniń usynystary qosylǵan jáne búgin RF prezıdenti Vladımır Pýtınniń oǵan qosylyp, bir izge túsirilgen usynystaryn qamtıtyn qujat bolady», - dep málimdedi Dmıtrıı Peskov. Qorytyndy mátinde úsh taraptyń talaptary eskeriledi: sál keıinirek dál osyndaı málimdememen GFR kansleriniń baspasóz hatshysy shyǵyp sóılep, mátinniń «Angela Merkel men Fransýa Olland bergen usynystar» negizinde jasalatynyn atap ótti.
Osymen birge, RF baspasóz hatshysynyń aıtýynsha, mátin «qoldaý alý úshin» barlyq taraptarǵa jiberiledi, al jumystyń aldyn ala qorytyndylary jeksenbi kúni atalmysh elder lıderleriniń telefon arqyly «normand formatynda» áńgimelerinde shyǵarylady. Jurttyń kópshiligi Ýkraınadaǵy daǵdarysty beıbit túrde sheshý jolyn tabýdyń «eń sońǵy múmkindigi» retinde qabyldaǵan kezdesýge taraptar barynsha yjdaǵatty jáne artyq dý-dabyrsyz daıyndaldy. Munyń baspasózge de qatysy bar. Beısenbi kúni Fransýa Olland Parıjde ótkizgen baspasóz máslıhatynan keıin óziniń Máskeýge baratyny týraly sensasııalyq málimdemesin jasady, Germanııa kansleri Angela Merkelmen birge olar Kıevke jol tartyp, onda Ýkraına prezıdenti Petr Poroshenkomen kelissóz júrgizdi.
Bes saǵatqa sozylǵan kezdesýdiń mazmuny týraly onshalyqty tereń ashylyp aıtylǵan joq. «Taraptar Donesk jáne Lýgansk oblystaryndaǵy shıelenisterdi beıbit jolmen retteýge qoldaý bildirip, buǵan Reseıdiń de múddeli ekenine senim artty», - dep málimdedi Ýkraına prezıdentiniń baspasóz hatshysy lıderlerdiń budan buryn Mınskide belgilengen talaptardy saqtaýǵa da shaqyrǵanyn ataı otyryp.
Eń basty qyzyǵýshylyq Máskeýde qandaı talaptap qoıylatyny jónindegi kelisim týrasynda boldy. Alaıda, kelissózdiń kún tártibi sońǵy sátke deıin qupııa ustaldy. RF prezıdentiniń baspasóz hatshysy atap ótkendeı, tipti Angela Merkel men Fransýa Olland tún qarańǵysynda kelgennen keıin Kremlde bastalǵan kezdesýdiń ózi áldeqandaı bir delegasııa músheleri men sarapshylardyń qatysýynsyz, «kózbe kóz» sıpatta ótkizildi. Aıtqandaı, RF-nyń, GFR-dyń jáne Fransııanyń joǵary laýazymdy sheneýnikteri lıderler kelissózin birneshe saǵattyń ishinde daıyndap úlgerdi.
Soǵan qaramastan, juma kúni Ýkraınadaǵy ahýaldy retteýdiń jańa josparlaryn talqylaıtyn jıynnyń ótip qalýy yqtımal ısharasy báribir baspasózge shyǵyp ketti. Máselen, Amerıkanyń The Wall Street Journal (WSJ) basylymy Máskeýde jasaqshylarǵa aýqymdy terrıtorııa men avtonomııa berý jónindegi máseleniń talqylanyp qalý nıeti bar ekenin habarlap qoıdy. Osyǵan uqsas áńgimeler Eýropa parlamenti depýtattarynyń arasynan da estilip jatty. Bul derek kózderinde Máskeýde shuǵyl kezdesý ótikizilip, onda da Donesk jáne Lýgansk oblystaryna úlken ókilettilik berilýi jóninde áńgime bolatyny aıtyldy.
Murat Aıtqoja.
Derek, sýret: «Kommersant».
