Foto: ashyq derekkóz
Resmı statıstıkaǵa súıensek, 2024 jyldyń 1 jeltoqsanynda el kóleminde elektr qýatymen júretin jeńil avtokólikter sany 1,6 esege artyp, 7,3 myńnan 12 myńǵa jetken. Kólikti elge ákelý kezinde óndirýshiler men ımporttaýshylar ýtılızasııalyq alymdardy tóleýden jáne bastapqy tirkeý qunynan bosatylady, bul avtomobıldiń kedendik qunynan 15% únemdeýge múmkindik beredi. Degenmen depýtattar elektromobıl tóńireginde sheshilmegen másele áli de kóp ekendigin aıtady.
«Atap aıtsaq, kólik qýattaıtyn oryndar órt qaýipsizdigi talaptaryna sáıkes kelmeıtin jerlerde ornalasqan. Bul óte ózekti másele. Sosyn, óńirlerde jáne respýblıkalyq mańyzy bar joldardyń boıynda kólik qýattaý stansalary tapshy. Tipti joq dese de bolady. Halyqaralyq tájirıbege sáıkes, elektromobılder men qoǵamdyq qýattaý stansalarynyń ońtaıly araqatynasy 10:1 bolýy kerek. Al Qazaqstanda qazirgi tańda 43 elektromobılge 1-ǵana qýattaý stansasy ǵana teń keledi eken», dedi depýtat N. Saılaýbaı.
Osyǵan oraı N. Saılaýbaı bastaǵan birqatar depýtat Kólik mınıstrligine, О́nerkásip jáne qurylys mınıstrligine jáne Energetıka mınıstrligine tómendegi usynysyn jetkizdi:
«Eń aldymen zańǵa elektr kólikteri týraly arnaıy tarmaq engizip, júıeli túrde retteý qajet. Osyǵan oraı, elektromobıldi 18 jastan bastap júrgizýge ruqsat berý máselesin qaıta qaraý qajet. Jaǵdaıdy eskere otyryp, biz Qazaqstanda elektr kólikterin damytýǵa arnalǵan ulttyq baǵdarlama ázirleýdi usynamyz».
