Fotolar: Aqorda
Sondaı-aq memleketter basshylarynyń qatysýymen resmı delegasııalar músheleri tómendegideı qujattarǵa qol qoıdy:
- Qazaqstan Respýblıkasy Úkimeti men Iordan Hashımıt Koroldigi Úkimeti arasyndaǵy ónerkásiptik yntymaqtastyq máseleleri boıynsha ózara túsinistik týraly memorandým;
- Qazaqstan Respýblıkasy Energetıka mınıstrligi men Iordan Hashımıt Koroldigi Atom energetıkasy jónindegi komıssııasy arasyndaǵy atom qýatyn beıbit maqsatta paıdalaný salasyndaǵy yntymaqtastyq máseleleri boıynsha ózara túsinistik týraly memorandým;
- Qazaqstan Respýblıkasy Ulttyq ekonomıka mınıstrligi men Iordan Hashımıt Koroldigi О́nerkásip, saýda jáne jabdyqtaý mınıstrligi arasyndaǵy ózara túsinistik pen yntymaqtastyq týraly memorandým;
- «Samuryq-Qazyna» ulttyq kompanııasy» AQ men Iordan Hashımıt Koroldigi Investısııalar mınıstrligi arasyndaǵy yntymaqtastyq týraly kelisim;
- Qazaqstan Respýblıkasy Prezıdenti Is basqarmasy «Qazaqstan Respýblıkasy Prezıdentiniń teleradıokesheni» sharýashylyq júrgizý quqyndaǵy respýblıkalyq memlekettik kásiporyny men Iordanııa radıo jáne televızııa korporasııasy (Jordan Radio and Television Corporation) arasyndaǵy ózara túsinistik pen yntymaqtastyq týraly memorandým.
Budan bólek, Memleket basshysynyń Iordanııaǵa resmı sapary aıasynda vedomstvoaralyq jáne kommersııalyq 10 qujatqa qol qoıyldy.
Birlesken málimdeme qabyldandy
Memleket basshysy Birlesken málimdemede Koroldi taqqa otyrǵanyna 25 jyl tolýymen quttyqtady. Bul mereıli data byltyr toılanǵan bolatyn. Qasym-Jomart Toqaev Uly Mártebeliniń parasatty basshylyǵymen saıası, áleýmettik-ekonomıkalyq, ákimshilik jáne basqa da salalardy qamtıtyn aýqymdy reformalar júzege asyrylǵanyn atap ótti.
Korol II Abdalla ben ál-Hýseın Qasym-Jomart Toqaevtyń halyqaralyq bastamalaryna, Qazaqstanda ekonomıkany jańǵyrtý, memlekettik basqarý júıesin jetildirý, zań ústemdigin qamtamasyz etý jáne áleýmettik ádildikti nyǵaıtý baǵytynda júrgizip jatqan reformalaryn qoldaıtynyn jetkizdi.
Memleketter basshylary ortaq qundylyqtar men múddelerge negizdelgen ekijaqty baılanystardy odan ári nyǵaıtýdyń mańyzyn, barlyq deńgeıdegi jan-jaqty dıalogty aldaǵy ýaqytta da jandandyrýǵa umtylystaryn rastady.
Birlesken málimdemede energetıka, aýyl sharýashylyǵy, ınfraqurylym, aqparattyq tehnologııalar, óńdeý ónerkásibi jáne farmasevtıka sııaqty salalarda ózara tıimdi saýda-ekonomıkalyq yntymaqtastyqty tereńdetý qajet ekeni aıtylǵan. Saýda-ekonomıkalyq baılanystardy arttyrý jáne túrli sektorlarda birlesken jobalardy júzege asyrý úshin qolaıly jaǵdaı jasaý maqsatynda jańa múmkindikterdi zerdeleýge ýaǵdalastyq jasaldy.
Taraptar atom salasyndaǵy yntymaqtastyqtyń aıasyn keńeıtýge daıyn ekenin rastady.
Eki el arasyndaǵy saýda-ekonomıkalyq baılanystardy nyǵaıtýǵa yqpal etetin kólik jáne logıstıka baǵyttaryn, sonyń ishinde Transkaspıı halyqaralyq kólik dálizin damytýdyń mańyzyna nazar aýdaryldy. Atalǵan salalardaǵy ártúrli jobalardy iske asyrý perspektıvalaryn zerdeleýge nıet tanytyp, týrızm salasyn damytý men iskerlik baılanystardy jandandyrý úshin eki el arasynda tikeleı áýe qatynasyn ashý múmkindigin qarastyrýǵa qos tarap ta múddeli ekenin bildirdi.
Memleketter basshylary bilim berý salasyndaǵy yntymaqtastyqty keńeıtýge, sonyń ishinde stýdentter men oqytýshylar almasýǵa, birlesken bilim berý baǵdarlamalary men ǵylymı zertteýlerdi ázirleýge kelisti. Olar sondaı-aq halyqtar arasyndaǵy dostyq baılanystardy nyǵaıtýǵa yqpal etetin kórmeler men mádenı kúnder sekildi birlesken is-sharalar uıymdastyrý arqyly mádenı baılanystardy tereńdetýge nıetti ekenin aıtty.
Taraptar bıyl Astana men Amman qalalary baýyrlastyǵynyń 20 jyldyǵy aıasynda festıvalder, kórmeler jáne ornyqty damý men tehnologııalar salasynda tájirıbe almasý sekildi birlesken mádenı jáne iskerlik sharalar ótkizýge daıyn ekenin jetkizdi.
Memleketter basshylary ekijaqty qatynastarǵa tyń serpin berip, múldem jańa deńgeıge shyǵarýǵa yqpal etetin kelissózderdiń nátıjesine kóńil tolatynyn atap ótti.
Qasym-Jomart Toqaev pen II Abdalla ben ál-Hýseın eki el úkimetterine Saýda-ekonomıkalyq, mádenı jáne gýmanıtarlyq yntymaqtastyq jónindegi Qazaqstan-Iordanııa úkimetaralyq komıssııasynyń otyrystaryn turaqty túrde ótkizýdi, sondaı-aq saýda-ekonomıkalyq jáne ınvestısııalyq yntymaqtastyqtyń perspektıvaly baǵyttaryn anyqtaý úshin Iskerlik keńestiń qyzmetin jandandyrýdy tapsyrdy.
Budan bólek, taraptar halyqaralyq jáne óńirlik máseleler, sonyń ishinde Taıaý Shyǵystaǵy jaǵdaı jóninde pikir almasty.
