«2023 jyly men estý qabileti buzylǵan balalardy memlekettik qoldaýmen qamtamasyz etý máselesin kóterdim. Atap aıtqanda, bul mıkrotııa jáne estý músheleriniń atrezııasy bar balalarǵa qatysty boldy. О́kinishke qaraı, bizdiń elde mundaı balalardyń kópshiligine múgedektik berilmeıdi», dedi depýtat.
Nartaı Aralbaıulynyń aıtýynsha, tórtinshi dárejeli kereńdik dıagnozy qoıylǵan balalarǵa ǵana múgedektik alady jáne olarǵa memleket esebinen estý protezderi beriledi, olar ár 5 jyl saıyn aýystyrylady. Al qalǵan úsh sanattaǵy estý qabileti buzylǵan balalar kómeksiz qalyp otyr, depýtattar máseleni birneshe ret talqylap, dóńgelek ústelder ótkizgen, sondaı-aq estý apparattaryn satyp alý úshin nesıe alýǵa májbúr bolǵan ata-analarmen birneshe ret kezdesken. Buǵan qosa, mundaı balalar jıi býllıngke ushyraıdy, keıbiri mektepke barýdan da bas tartqan jaǵdaılar bolypty.
«Osy másele boıynsha eki jyl boıy jumys istedik jáne, aqyry, mıkrotııa jáne atrezııa dıagnozymen týǵan balalar men eresekterdi jergilikti bıýdjet esebinen estý apparattarymen qamtamasyz etý týraly normany engizdik. Bul – úlken qadam, óıtkeni estý apparattarynyń baǵasy arzan emes: eń tómengi quny – 500 myń teńgeden bastalyp, 5 mıllıon teńgege deıin jetedi», dedi ol.
Aıta keteıik, qabyldanǵan túzetýlerge sáıkes, jergilikti atqarýshy organdar estý qabileti buzylǵan barlyq sanattaǵy balalar men eresekterdi estý apparattarymen qamtamasyz etý úshin qarajat bólýleri tıis. Sonymen qatar olar bul apparattardy ýaqytyly satyp alyp, ár 5 jyl saıyn jańartyp otyrýǵa mindetti.
