Kezdesýdi jyly esteliktermen bastaǵan moderator, PhD, «Jolshy» fılosofııalyq qoǵamynyń tóraǵasy Nurjan Qulymjanov ǵalymnyń ádisnamasy epostaný, etnomýzykologııa, etnografııa, etnopsıhologııa, folklortaný men ádebıettanýdyń damýyna aıtarlyqtaı áseri haqynda oı órbitip, qatysýshylardyń nazaryn osy baǵyttaǵy eńbekterine aýdardy.
Kitaphananyń ashylýyna qatysqan «AlmaU» prezıdenti Asylbek Qojahmetov «Edige Tursynov – óz ómirin qazaq aýyz ádebıeti men folkloryn zertteýge arnaǵan kórnekti zertteýshi. Kitaphanamyz onyń kóp jylǵy eńbekteri men ǵylymı izdenisteriniń nátıjeleri jınalatyn orynǵa aınalary sózsiz», dep atap ótti.
Qazirgi ýaqytta «AlmaU» qoryna qalanǵan Edige Tursynovtyń jeke kitaphanasy 2 myńǵa jýyq kitappen tolyqpaq. Jıynda tarıh ǵylymdarynyń doktory Marat Sembın ǵalymnyń elimiz táýelsizdik alǵanǵa deıingi ǵylymdaǵy ómiri, tabandylyǵy men bilimge degen qushtarlyǵynyń arqasynda mol mura jınaǵanyn tilge tıek etti. Bul óskeleń urpaqtyń tarıhymyz ben ádebıetimiz týraly sırek qormen tanysýyna múmkindik beredi.
Ál-Farabı atyndaǵy Qazaq ulttyq ýnıversıtetiniń professory, túrkitanýshy Qaırat Jańabaev ǵalym Edige Tursynovtyń erekshe oqyrman bolǵanyn eske aldy. «Ǵylymı baspadan shyqqannyń bárin keıinge qaldyrmaı, qaryndashpen belgilep otyryp, syn-eskertpeler, tolyqtyrýlaryn engizip, birden oqýǵa tyrysatyn. О́z kitaphanasy úshin de, oqyrman úshin de eń jaqsy ǵylymı ádebıetterdi tańdaýǵa kásibı kózqaraspen qarady», dedi ol.
Fılosofııa ǵylymdarynyń doktory, mádenıettanýshy, Qurmanǵazy atyndaǵy Qazaq ulttyq konservatorııasynyń professory Almıra Naýryzbaeva: «Edige Tursynov qazaq folklorynyń shynaıy baılyq ekenin túsinýge shabyttandyrdy. Biz sııaqty ótken ǵasyrdyń 70-jyldardaǵy urpaqtaryn mádenı murany qurmetteýge úndedi. Ol folklordy zertteýde ǵana emes, elimizdiń áleýmettik-gýmanıtarlyq ǵylymynyń ádisnamasynda serpilis jasaǵan ǵalym», dedi. Is-shara stýdentterdiń mýzykalyq jáne teatrlandyrylǵan qoıylymyna ulasty.
ALMATY
