Sýretti túsirgen – avtor
Senbiniń tańynda Samar aýdandyq ishki saıasat bóliminiń qyzmetkerleri muz ústinde qarmaq salyp otyrǵan demalýshylardy ózara saıysqa túsýge shaqyrǵan. Nıet bildirgenderdiń barlyǵyna áýeli jarystyń erejesi túsindirildi. Iаǵnı bir saǵattyń ishinde kim kóp balyq aýlaıdy, sol jeńiske jetedi. Aýlanǵan balyqtar sanymen emes, salmaǵymen ólshenedi. Sonymen qatar balyq qaı qatysýshynyń qarmaǵyn birinshi qabady, oǵan da arnaıy syılyq qarastyrylǵan. Eń úlken balyq ustaǵan qatysýshy da qur qaıtpaıdy dep sheshildi. Sóıtip, bir saǵat ýaqyt belgilenip, balyqshylar ár-ár jerge shoqıdy. Baq synaýǵa kirisken balyqshylardyń eń úlkeni 72 jastaǵy Vera Dmıtrıeva bolsa, eń jasy 5-synyp oqýshysy Tórejan Eraly edi.
– Balyq aýlaý – jan tynyshtyǵy. Kúndelikti kúıki tirlikti bir sátke umyttyrady. Al osyny keremetteı jarysqa ulastyryp jatqan azamattarǵa alǵys aıtamyn, – deıdi balyqshy Ámirhan Yhaı.
Áp-sátte belgilengen ýaqyt aıaqtalyp, qazylar alqasy aýlanǵan balyqty esepteýge kirisken. Qorytyndy boıynsha, jarysqa belsene qatysqan bir úıdiń balalary Tórejan Eraly men Erjan Eraly «Eń jas qatysýshy» atalymymen marapattalyp, baǵaly syılyqtarǵa ıe boldy. Júldeli úshinshi oryn Jandos Qaıyrbekovke buıyrdy. Al ekinshi orynǵa bir oryndy tapjylmaı qarmaq qaptyrǵan Andreı Ekkel ıelendi. Bir saǵattyń ishinde jalpy salmaǵy eki kılo balyq aýlaǵan Ámirhan Yhaı birinshi oryndy qanjyǵaǵa basty. Aıtylǵandaı, baıqaý munymen aıaqtalmaıdy, aldaǵy ýaqytta da jalǵasyn tabady. Sýdy jaǵalaı jatqan kórshiles aýdandar da jarysty birlesip uıymdastyrýǵa usynys bildirip otyr.
Shyǵys Qazaqstan oblysy,
Samar aýdany
