Jarystyń basty básekesinde erkin kúres sheberleri – amerıkalyq Kaıl Snaıder men qazaq Rızabek Aıtmuhan aıqasady. Rızabektiń esimi elimizdiń erkin kúres sheberleri arasynan shyqqan tuńǵysh álem chempıony retinde tarıhta qaldy. Bul ataqqa 2023 jyly Belgradta qol jetkizdi. Ákesi Qanat Joldasbaevtyń qol astynda jattyǵatyn 20 jastaǵy asa daryndy sportshynyń basqa da ataqtary bar. Rızabek aınaldyrǵan bir jyl aralyǵynda jastar arasyndaǵy álem birinshilikterinde (U-20, U-23) eki márte top jardy. 2023 jyly Astanada, 2024 jyly Bishkekte uıymdastyrylǵan Azııa chempıonatynda kúmispen kúpteldi.
Rızabektiń qarsylasy, 97 kg salmaq dárejesinde beldesip júrgen 29 jastaǵy AQSh-tyń Merılınd shtatynyń týmasy áýeli jastar býyny arasyndaǵy jarystarda ózin túbegeıli moıyndatty. Eresekter dýyna qosylǵannan keıin Kaıl Snaıder Rıo Olımpıadasynyń jeńimpazy, Tokıo Olımpıadasynyń kúmis júldegeri atanyp, álem chempıonattarynda jeti márte (3 altyn, 2 kúmis, 2 qola) jeńis tuǵyryna kóterildi. Álem kýbogin 2, Panamerıka oıyndaryn 3, Panamerıka chempıonatyn 7 retten utty.
Erkin kúresten ótetin jarysta Azamat Dáýletbekov te (86 kg) óner kórsetedi. Semeı óńiriniń týmasy Magomedhabıb Kadımagomedovpen kúsh synasady. Azamat – álem chempıonatynyń eki dúrkin qola júldegeri, Azııanyń úsh dúrkin chempıony. Daǵystanda dúnıege kelgenimen Belarýstiń atynan synǵa túsip júrgen qarsylasy 2020 jyly Tokıo Olımpıadasynda kúmis, Álem kýboginde qola, Eýropa chempıonatynda altyn aldy. Sondaı-aq reseılik Zaýr Ýgýev (Tokıo Olımpıadasynyń jeńimpazy, álemniń eki dúrkin chempıony, Álem kýboginiń ıegeri), Álıhan Jabraılov (álem chempıonatynyń qola júldegeri, Eýropa chempıony, Álem kýboginiń eki dúrkin ıegeri), Ahmed Ýsmanov (álem men Eýropa chempıony, Álem kýboginiń ıegeri), grýzııalyq Avtandıl Kenchadzeniń de (álem chempıony, álem chempıonatynyń kúmis júldegeri, Eýropa oıyndary men qurlyq birinshiliginiń tórt dúrkin qola júldegeri) óneri jankúıerlerdi beıjaı qaldyrmaıdy degen oıdamyz.
Grek-rım kúresinen qyrǵyz Aqjol Mahmudov pen fransýz Ibragım Ganem saıysqa túsedi. «Akýla» degen búrkenshik esimmen tanylǵan aıyr qalpaqty aǵaıynymyz Tokıo Olımpıadasynda kúmis, Parıj Olımpıadasynda qola medaldi moınynda jarqyratty. Eki dúrkin álem, úsh dúrkin qurlyq chempıony atandy. Azııa oıyndarynda kúmiske qol sozdy. Aqjolmen aıqasatyn tegi mysyrlyq marqasqa sońǵy eki dúnıejúzilik dodada bir altyn men bir kúmisti qorjynǵa saldy. Alataý baýraıynda beldesýge bel býǵandar qatarynda kýbalyq Gabrıel Rosılo men Lýıs Orta Sanchez, armenııalyq Slavık Galstıan men Aık Hloıan, belarýs Kırıll Maskevıch, reseılik Artýr Sargsıan syndy sańlaqtar bar.
Áıelder kúresi de kópshilik nazaryna usynylady. Bul oraıda jankúıer qaýym Jámıla Baqbergenova men Aıperi Medetqyzynyń tartysyn taǵatsyzdana kútedi. Qazaq qyzy álemniń tórt (3 kúmis, 1 qola), Azııanyń bes (3 altyn, 1 kúmis, 1 qola) chempıonatynda olja saldy. Azııa oıyndarynda kúmis medaldi moınynda jarqyratty. Qyrǵyz qyzy da myqty balýandar sanatynda. Ol álem chempıonaty (1 kúmis, 1 qola) men Azııa oıyndarynda (1 altyn, 1 qola), qurlyq birinshiliginde (2 altyn, 3 kúmis) bes ret atoı saldy. Qos arý ózara birneshe márte aıqasty, bir-biriniń qyr-syryn jaqsy biledi. Osy jaıttyń ózi aldaǵy beldesýdiń asa tartysty bolatynyn ańǵartady.
Almatydaǵy jarysta esimderi joǵaryda atalǵandardan bólek, basqa da bir shoǵyr ataqty balýandar óner kórsetedi.
