Startap negizin qalaýshy Asylzat Isataevanyń aıtýynsha, rentgen sýretterin taldaý – uzaq ári kúrdeli úderis. Dárigerler jaq súıekteriniń ornalasýyn qolmen ólshegendikten qatelesý yqtımaldylyǵy joǵary. Al naýqas onyń zardabyn ómir boıy tartýy múmkin.
«Jumysymyzdy alǵash bastaǵan kezde bizge bir qyz habarlasty. Ol 5 jyl boıy durys ornatylmaǵan breket taǵyp kelgen. Sonyń saldarynan jaq súıegi shamadan tys qysylyp, moıyn omyrtqasyndaǵy nerv zaqymdanǵan. Aqyrynda, bul jaǵdaı onyń aıaqtarynyń ýaqytsha sal bolýyna ákelgen. Minekeı, osy oqıǵa bizdiń ónimniń dárigerler men qarapaıym adamdarǵa qanshalyqty mańyzdy ekenin kórsetti. Qazirgi tańda platforma orys, aǵylshyn, arab, portýgal tilderinde qoljetimdi. Tehnologııamyz ámbebap bolǵandyqtan, ony kez kelgen elde qoldanýǵa bolady», deıdi A. Isataeva.
Qajetti dúnıe qashanda suranysqa ıe. Qazir 50-den astam stomatologııalyq klınıka men dıagnostıkalyq ortalyq atalǵan platformany kúndelikti tájirıbede qoldanyp, ıgiligin kórip otyr. 2025 jyldyń birinshi toqsanynda bul kórsetkishti 150-ge deıin arttyrý josparlanǵan. Kompanııanyń negizgi maqsaty – MENA (Taıaý Shyǵys jáne Soltústik Afrıka) aımaǵyna shyǵý. Taǵy bir qýantarlyq jańalyq, jaqyn kúnderi Saýd Arabııasynda, Birikken Arab Ámirlikterinde, basqa da elderde «Aidentis»-tiń qanatqaqty jobalary iske qosylmaq.
Aıta keteıik, «Aidentis» – tek tájirıbeli dárigerlerge ǵana emes, stýdentter men jas stomatologterge de taptyrmas qural. Bul modýl olar úshin vırtýaldy zerthana qyzmetin atqarady. Iаǵnı stýdentter rentgen sýretterin taldaýdy úırenedi, emdeý josparyn qurýdy meńgeredi. Joba jetekshisiniń aıtýynsha, «Aidentis» seriktesteri qatarynda medısınalyq ýnıversıtetter, kásibı qaýymdastyqtar, stýdenttik uıymdar bar.
«Jaqynda Semeı medısına ýnıversıtetimen memorandýmǵa qol qoıdyq. Endi osy modýl oqý baǵdarlamasyna engiziledi. Stýdentter – platformanyń bolashaq qoldanýshylary. Jyl saıyn elimizdegi ýnıversıtetter shamamen 100 stomatolog mamanyn daıarlap shyǵarady, olardyń kóbi osy salada qyzmet etedi. Olar bolashaqta jasandy ıntellekt quraldaryn medısınalyq ortalyqtaryna engizip, áriptesterine onyń artyqshylyqtaryn túsindiredi. Qazir klınıkalar qymbat jabdyq satyp alyp, biraq em-dom barysynda jasandy ıntellektiniń múmkindigin qoldanbasa, ony zamanaýı medısınalyq ortalyq dep ataý qıyn», deıdi startap negizin qalaýshy.
«Aidentis»-ti qoldanýǵa kompıýter men ınternet bolsa jetkilikti. Platforma árbir tistiń jaǵdaıyn, buryshtaryn eseptep, panoramalyq keskinder men dıagrammalar túrinde taldaý usynady. Taǵy bir ereksheligi – rentgen sýretterin óńdeý jyldamdyǵy men dáldigi. Dástúrli dıagnostıka kezinde dárigerge rentgen sýretterin muqııat qarap, jaq súıekteri men tisterdiń ornalasýyn anyqtaýǵa kóp ýaqyt jumsaýǵa týra keledi. Bul úderis keıde birneshe saǵatqa sozylýy múmkin. Al «Aidentis» algorıtmderi dıagnozdy sekýndtar ishinde jasap shyǵarady.
«Jasandy ıntellekt – dárigerdi almastyratyn qural emes, oǵan kómekshi. Bizdiń maqsatymyz – stomatologterdiń jumysyn jeńildetý, olardy artyq júktemeden bosatý. Adam faktorynyń áserin azaıtý arqyly dıagnostıka sapasyn jaqsartý. Jasandy ıntellekt dárigerdiń kómekshisi retinde qandaı da bir kúmándi belgi baıqalsa, júıe dárigerge habarlaıdy. Osylaısha, sońǵy sheshimdi árdaıym maman qabyldaıdy. Qysqasy, tehnologııa men adam faktoryn biriktiretin eń tıimdi ádis. Endi jasandy ıntellekt kómegine júgingen kezde tis dárigerleri ýaqytty únemdep qana qoımaı, burynǵydan birneshe ese kóbirek tabys taba alady. Sebebi únemdelgen ýaqytyn basqa pasıentterdi qabyldaýǵa jumsaıdy», deıdi Asylzat Isataeva.
Jaqynda «Aidentis» startaby Qazaqstan Stomatologııalyq assosıasııasymen (QSA), Qazaqstan stýdent-stomatologter qaýymdastyǵymen (DAS) strategııalyq seriktestik ornatty. QSA – elimizde 19 fılıaly bar, stomatologııa salasyndaǵy ártúrli deńgeıdegi mamandardy biriktiretin uıym. «Aidentis»-pen áriptestik jasandy ıntellekt tehnologııalaryn klınıkalyq dıagnostıkaǵa engizýge, jas mamandardy daıarlaý múmkindikterin keńeıtýge jol ashady.
«Aidentis» startabynyń áleýetin olardyń jasandy ıntellekt taqyrybyndaǵy dárisin tyńdaǵan kezde baıqadyq. Bul baǵyt – stomatologııanyń bolashaǵy. Endi biz osy tehnologııalardy klınıkalarymyzǵa engize otyryp, mamandar men stýdentterdiń daǵdylaryn damytyp, dıagnostıka sapasyn jaqsartýǵa kómektese alamyz», dedi QSA prezıdenti Dana Ospanova.
Sonymen qatar platforma bolashaqta qyzmetin keńeıtip, jańa múmkindikter usynýdy josparlap otyr. Atap aıtqanda, stomatologııalyq hırýrgııa, ımplantologııa, terapııa baǵyttarynda jasandy ıntellektini qoldanbaq. Bul – stomatologııadaǵy dıagnostıkadan bastap emdeý úderisine deıingi barlyq kezeńge jańa deńgeı ákeletin mańyzdy qadam. Aldaǵy ýaqytta osynaý ınnovasııalyq sheshim álemdik deńgeıde óz ornyn taýyp, básekege qabiletti ónimge aınalary sózsiz.
