Foto: akorda.kz
Prezıdentke byltyr 214 nysanda quny shamamen 11 trıllıon teńgeni quraıtyn 27 aýdıtorlyq is-shara ótkizilgeni týraly baıandaldy. Sonyń nátıjesinde jalpy somasy 862 mıllıard teńge bolatyn túrli normalardyń buzylǵany anyqtaldy. Tekseristerdiń qorytyndysy boıynsha bıýdjetke 135 mıllıard teńge qaıtaryldy. Bul 2023 jyly ótelgen qarjydan bes ese artyq.
Memleket basshysyna qurylys nysandaryndaǵy baǵa qalyptastyrý, óńdeý ónerkásibi jobalaryn qarjylandyrý, aýyl sharýashylyǵyn sýbsıdııalaý isinde olqylyqtar únemi baıqalatyny aıtyldy.
Joǵary aýdıtorlyq palata barlyq anyqtalǵan zań buzýshylyqty joıý úshin Úkimetke usynym berip, jaýapty memlekettik organdarǵa nusqama joldaǵan.
Álıhan Smaıylov bıyl 40-tan astam aýdıtorlyq is-shara ótkizý josparlanǵanyn jetkizdi. Memleket basshysynyń tapsyrmasy boıynsha Astana jáne Almaty qalalary, Soltústik Qazaqstan, Qostanaı jáne Jambyl oblystary, sondaı-aq «Samuryq-Qazyna» qory, «Qazatomónerkásip» ulttyq kompanııasy, KEGOC kásiporyny, Ulttyq bank, Tótenshe jaǵdaılar mınıstrligi bıýdjetteriniń oryndalýy tekseriledi. Sonymen qatar ǵylym, qorǵanys, quqyqtyq tártipti saqtaý, sport, áleýmettik qamtamasyz etý, orman sharýashylyǵy salalarynda aýdıtorlyq tekserister júrgiziledi.
Kezdesý sońynda Prezıdent memlekettik aýdıt júıesin jetildirý jónindegi jumysty jalǵastyrýdy tapsyrdy. Sonymen qatar bıýdjet qarjysynyń ıgerilýin tıimdi baqylaý úshin zamanaýı sıfrlyq sheshimderdi engizýdiń mańyzyna nazar aýdardy.
